Foto nga VCG

Punëtorët në gjashtë vende të Eurozonës po fitojnë 5.2 për qind më shumë sot se sa një vit më parë, bëri të ditur një raport i gjurmuesit të pagave, sipas të cilit pagat e tyre ende nuk kanë arritur t’i bëjnë ballë inflacionit.

“Indeed Wage Growth Tracker”, një projekt i përbashkët midis Bankës Qendrore të Irlandës dhe faqes së internetit të punësimit “Indeed”, shikon të dhënat në kohë reale nga postimet e punës në internet për të prodhuar përditësime mujore rreth modeleve të pagave.

Analiza e saj e fundit zbuloi se paga është rritur në Francë, Gjermani, Irlandë, Itali, Holandë dhe Spanjë me një mesatare prej 5.2 për qind që nga fundi i tetorit 2021, që krahasohet me vetëm 1.5 për qind gjatë 2019, viti i parë i funksionimit të gjurmuesit, citon “China Daily”.

Gjashtë kombet e analizuara janë ekonomitë më të mëdha në Eurozonë, e cila është një grupim prej 19 kombesh që janë anëtarë të Bashkimit Evropian dhe që përdorin euron për monedhë.

Sipas studimit, ka pak dëshmi se rritja e pagave do të ngadalësohet së shpejti.

“Këto tendenca përputhen me pritjet e bankave qendrore që pagat të vazhdojnë të rriten shumë mbi normat parapandemike së afërmi”,- bëri të ditur raporti i “Indeed Ëage Groëth Tracker”. (Irma)