Teknologjia bërthamore e Kinës vitet e fundit është aplikuar gjerësisht në shumë fusha të ekonomisë kombëtare, duke sjellë përfitime të prekshme për jetesën e njerëzve, bëri të ditur Autoriteti i Energjisë Atomike të Kinës (CAEA).
Mbi 90 ekspertë dhe studiues u mblodhën në forumin tremujor të CAEA të mërkurën, për të diskutuar mbi teknologjinë bërthamore për të mirën e jetesës së njerëzve, duke mbuluar situatën aktuale dhe perspektivat e ardhshme të aplikimeve të teknologjisë bërthamore në Kinë.
Sipas Dong Baotong, zëvendësdrejtor i CAEA, teknologjia bërthamore përdoret në shumë fusha si industria, bujqësia, kujdesi shëndetësor, mbrojtja e mjedisit dhe siguria, bën të ditur “Xinhua”.
“Ai luan një rol të rëndësishëm në promovimin e transformimit dhe përmirësimit industrial, si dhe në përmirësimin e jetesës së njerëzve”,- tha ai.
Forumi zbuloi 10 ngjarje kryesore që demonstrojnë rezultatet e rëndësishme të teknologjisë bërthamore të aplikuara në ekonominë kombëtare në vitet e fundit. Shumica janë në fushën e kujdesit shëndetësor, siç është përshpejtuesi i parë mjekësor me jon të rëndë në Kinë, i përdorur në radioterapi për të trajtuar kancerin.
Sipas forumit, teknologjia bërthamore ka luajtur gjithashtu një rol të rëndësishëm në parandalimin dhe kontrollin e pandemisë Covid-19. Është përdorur për sterilizimin e materialeve mjekësore me efikasitet më të lartë dhe efekt më të mirë sterilizimi.
Teknologjia bërthamore është përdorur gjithashtu në eksplorimin e hapësirës. Një ekip kërkimor nga Instituti Kërkimor i Gjeologjisë së Uraniumit në Pekin, një degë e Korporatës Kombëtare Bërthamore të Kinës, ka zbuluar së fundmi një mineral të ri hënor me anë të difraksionit të rrezeve X dhe metodave të tjera të analizës së teknologjisë bërthamore.
Përmirësimi i nivelit të aplikimit të teknologjisë bërthamore është bërë një kërkesë e natyrshme për ndërtimin e një industrie të fortë bërthamore në Kinë dhe është gjithashtu një hap i rëndësishëm për të promovuar zhvillimin me cilësi të lartë të ekonomisë kombëtare, tha Dong. (Irma)
