Presidenti meksikane përshkroi të enjten si "marrëzi" kërkesën e qeverisë amerikane për konsultime për zgjidhjen e mosmarrëveshjeve sipas Marrëveshjes Shtetet e Bashkuara-Meksikë-Kanada (USMCA) mbi politikën energjetike të Meksikës, njofton Xinhua.

Andres Manuel Lopez Obrador, presidenti meksikan(Foto:VCG)

"Po vjen një konsultim dhe është krejtësisht marrëzi," tha Lopez Obrador gjatë konferencës së tij të përditshme për shtyp në Pallatin Kombëtar në Mexico City.

Sipas presidentit, qëndrimi i SHBA-së miraton "një ton arrogant prepotence" për të pretenduar se "reforma energjetike që u ndërmor në vend në vitin 2013 ishte zgjidhja" për efiçencën e energjisë, në kundërshtim me politikat e administratës së tij.

Shtetet e Bashkuara kërkuan konsultime në fund të korrikut, duke argumentuar se reformat aktuale energjetike të Meksikës shkelin kushtet e marrëveshjes së tregtisë së lirë USMCA duke i dhënë përparësi kompanive shtetërore të naftës dhe gazit, ndër të tjera.

Ish-presidenti meksikan Enrique Pena Nieto (2012-2018) udhëhoqi reformat që hapën sektorin e nacionalizuar të energjisë të Meksikës ndaj investimeve private.

Lopez Obrador tha se kërkesa për konsultime ishte e panevojshme sepse ai ishte takuar tashmë me drejtuesit e biznesit të SHBA për të adresuar shqetësimet e tyre "rast pas rasti", duke çuar në angazhime investimi shumëmilionëshe.

Presidenti përjashtoi mundësinë e tërheqjes së Meksikës nga USMCA për shkak të mosmarrëveshjeve me partnerët e saj. Sipas Ministrisë së Ekonomisë të Meksikës, kjo është hera e katërt që përdoret mekanizmi i zgjidhjes së mosmarrëveshjeve të USMCA që kur marrëveshja hyri në fuqi në korrik 2020. USMCA zëvendësoi Marrëveshjen e Tregtisë së Lirë të Amerikës së Veriut të vitit 1994 (NAFTA) me një rinovim të disa kapitujve. (Fatosi)