OBSh-ja: Rastet e lisë së majmunit bien 21 %, përmbyset prirja njëmujore e rritjes
2022-08-26 20:19:59

Një infermiere përgatit një dozë vaksine kundër lisë së majmunit në një pikë vaksinimi të Kontenë L.A. në Los Anxhelosin Lindor, 10 gusht 2022. /CFP

Një infermiere përgatit një dozë vaksine kundër lisë së majmunit në një pikë vaksinimi të Kontenë L.A. në Los Anxhelosin Lindor, 10 gusht 2022. /CFP

Numri i rasteve të lisë së majmunit të raportuara globalisht ra me 21 për qind javën e fundit, duke përmbysur një prirje njëmujore të rritjes së infeksioneve dhe duke sinjalizuar se shpërthimi i sëmundjes në Evropë mund të ketë filluar të dobësohet, tha Organizata Botërore e Shëndetësisë (OBSh) të enjten.

OBSh-ja raportoi 5 907 raste të reja javore dhe tha se dy vende, Irani dhe Indonezia, raportuan rastet e tyre të para. Deri më sot, më shumë se 45 000 raste të lisë së majmunit janë raportuar në 98 vende që nga fundi i prillit.

Amerikat zunë 60 për qind të rasteve muajin e kaluar, ndërsa rastet në Evropë përbënin rreth 38 për qind, njoftoi OBSh-ja, duke shtuar se infeksionet në Amerikë treguan "një rritje të madhe të vazhdueshme ".

Në një konferencë shtypi të enjten, drejtori i përgjithshëm i OBSh-së Tedros Adhanom Ghebreyesus tha se, megjithëse kishte tregues që shpërthimi i lisë së majmunit po ngadalësohej në Evropë, e cila dikur zinte 90 për qind të rasteve të konfirmuara nga laboratorët në botë, përhapja e virusit tani po shkakton shqetësime gjetkë.

"Në Amerikën Latine në veçanti, ndërgjegjësimi ose masat e pamjaftueshme të shëndetit publik po kombinohen me mungesën e vaksinave, duke ndezur flakët e shpërthimit," u shpreh numri një i OBSh-së.

Në fund të korrikut, ai e deklaroi përhapjen e paprecedentë të lisë së majmunit në dhjetëra vende si një emergjencë globale, pavarësisht mungesës së konsensusit në komitetin e tij të ekspertëve.

Meqenëse shpërthimet e lisë së majmunit në Evropë dhe Amerikën e Veriut u identifikuan në maj, OBSh-ja dhe agjencitë e tjera shëndetësore kanë vërejtur se ajo ishte përhapur pothuajse vetëm te meshkujt që kryenin marrëdhënie seksuale me meshkuj.

Lia e majmunit ka qenë endemike në disa pjesë të Afrikës për dekada dhe ekspertët dyshojnë se shpërthimet në Evropë dhe Amerikën e Veriut u shkaktuan pasi sëmundja filloi të përhapet nëpërmjet seksit në dy festa kërcimi në Spanjë dhe Belgjikë.

Raporti i fundit i OBSh-së tregon se 98 për qind e rasteve janë te meshkujt, dhe ndër ata që raportuan orientimin seksual, 96 për qind janë te meshkujt që kryejnë marrëdhënie seksuale me meshkuj.

OBSh-ja ka rekomanduar që meshkujt me rrezik të lartë të sëmundjes të marrin parasysh përkohësisht mundësinë e uljes së numrit të partnerëve seksualë dhe të përmbahen nga seksi në grup ose anonim.

Lia e majmunit zakonisht përhapet nga kontakti lëkurë më lëkurë ose lëkurë më gojë me lezionet e një pacienti të infektuar. Njerëzit mund të infektohen edhe nëpërmjet kontaktit me veshje a mbulesa të infektuara.