Foto nga VCG
Autoritetet kineze kanë kërkuar marrjen e masave të shënjestruara për të zbutur ndikimin e thatësirës, në përpjekje për të siguruar korrje të mbara vjeshte këtë vit.
Që nga fundi i korrikut, valët e të nxehtit kanë përfshirë pjesët jugore të Kinës, duke paraqitur sfida të rënda për prodhimin e kulturave të vjeshtës, sipas një njoftimi të publikuar të martën nga Ministria e Bujqësisë dhe e Çështjeve Rurale, Ministria e Burimeve Ujore, Ministria e Menaxhimit të Emergjencave dhe Administrata Meteorologjike e Kinës.
Autoritetet përkatëse duhet të shpallin alarmin për temperaturat e larta në kohën e duhur dhe të zbatojnë masa të shënjestruara për të zbutur efektet negative të motit të nxehtë në prodhimin e drithërave të vjeshtës, thuhet në njoftimin e postuar në uebsajtin e Ministrisë së Bujqësisë.
Duhet të bëhen më shumë përpjekje për të siguruar ujë të mjaftueshëm për ujitje, për të hapur burime të reja ujore, për ujitjen me pika dhe për të krijuar reshje artificiale kur është e nevojshme.
Po sipas njoftimit, Kina gjithashtu do të mobilizojë ekipe të specializuara për të ndihmuar në përpjekjet për lehtësimin e thatësirës.
Prodhimi i drithërave të vjeshtës në Kinë përbën rreth 75 për qind të prodhimit vjetor të drithit. Kina synon të arrijë një prodhim drithi prej më shumë se 650 miliardë kilogramësh këtë vit.
