Në raportin e kohëve të fundit të "Perspektivës Ekonomike Globale" nga Banka Botërore theksohet se për shkak të përhapjes së vazhdueshme të koronavirusit të llojit të ri, ekonomia botërore do të ketë rënie në gjysmën e parë të vitit 2021. Në një seminar të mbajtur nga një think-tank për globalizimin më 13 janar, eksperti i Bankës Botërore theksoi se rënia e investimeve dhe rritja e borxhit janë ndikimet kryesore që koronavirusi ka ushtruar në ekonomitë e vendeve të ndryshme dhe rimëkëmbja ekonomike e Kinës është rast i veçantë në Azinë Lindore, duke mbështetur rimëkëmbjen ekonomike në botë, sidomos në vendet e Azisë Lindore dhe vendet në zhvillim. Banka Botërore vuri në dukje se në vitin 2020, Kina mund të bëhet e vetmja ekonomi e madhe që regjistron rritje ekonomike. Banka Botërore parashikoi se rritja e PBB-së së Kinës do të jetë 7.9% në vitin 2021. Në të njëjtën kohë, falë nxitjes nga Kina, tregjet në zhvillim do të rriten me 5% këtë vit, shifër kjo më e lartë se 4.6% që ishte parashikuar më parë.
Drejtori i Bankës Botërore për Kinën, Korenë e Jugut dhe Mongolinë Martin Raiser tha se ekonomia kineze ka një mëkëmbje në "në formë V", ndërsa vendet e tjera rimëkëmbje "në formë L". Në kontekstin e rënies së investimeve globale, vëllimi i investimeve dhe tregtisë së Kinës mbeti i qëndrueshëm. Kina e konsideron konsumin si motorin kryesor të rritjes, ndërsa vazhdon të investojë në infrastrukturë. Për më tepër, Kina ka promovuar vazhdimisht digjitalizimin në fushat e financave dhe konsumit.
Ky model i rimëkëmbjes u ka siguruar vendeve përvojë me zhvillimin e qëndrueshëm ekonomik pas epidemisë. Vlen të theksohet se, në krahasim me vendet e tjera, industria prodhuese e Kinës është e pjekur, veçanërisht në fushën e pajisjeve mjekësore. Kina jo vetëm që përmbush nevojat e veta, por gjithashtu mund të ofrojë furnizime mjekësore për pjesën tjetër të botës. Kjo garanton shërimin e ekonomisë kineze dhe ndërkohë ofron kontribut në botë.(Vera/Albana)
