Një zyrtar i Organizatës Botërore të Shëndetësisë tha se misioni i ekipit hulumtues në Kinë është gjetja e përgjigjeve shkencore mbi koronavirusin.

Shefi i Programit të Emergjencave Shëndetësore Michael Ryan tha gjithashtu se të kuptuarit e origjinës së koronavirusit të llojit të ri nuk ka të bëjë me gjetjen e dikujt për ta fajësuar.

Drejtuesja teknike e OBSh-së për COVID-19, Maria Van Kerkhove, shtoi se studimet kërkimore do të bëhen në vendin ku u identifikuan pacientët e parë.

Një ekip ekspertësh ndërkombëtarë i OBSh-së do të mbërrijë në Kinë të enjten për të kryer kërkime të përbashkëta me shkencëtarë kinezë mbi koronavirusin e llojit të ri.

Pala kineze është shprehur se mbështet të gjitha vendet anëtare në zhvillimin e bashkëpunimit mbi origjinën shtazore të virusit nën udhëheqjen e OBSh-së. (Albana/Fani)