Foto: VCG
Gati një e treta e të gjitha grave në vendet në zhvillim fillojnë të lindin në moshën 19 vjeç, sipas UNFPA, agjencia e OKB-së për shëndetin seksual dhe riprodhues. Në një raport të publikuar të martën, cituar nga “Xinhua”, thuhet se gati gjysma e lindjeve të para tek adoleshentët janë nga fëmijët ose vajzat e moshës 17 vjeç e lart. Ndërsa lindshmëria totale në të gjithë globin ka rënë, raporti i UNFPA tregon se gratë që filluan të lindnin fëmijë në adoleshencë kishin pothuajse pesë lindje në kohën kur arritën moshën 40 vjeç midis viteve 2015 dhe 2019.
“Kur gati një e treta e të gjitha grave në vendet në zhvillim bëhen nëna gjatë adoleshencës, është e qartë se bota po dështon me vajzat adoleshente. Shtatzënitë e përsëritura që shohim te nënat adoleshente janë një tregues i qartë se ato kanë nevojë të dëshpëruar për informacion dhe shërbime për shëndetin seksual dhe riprodhues”, -tha drejtoresha ekzekutive e UNFPA-së, Natalia Kanem.
Pas lindjes së fëmijës së tyre të parë, lindja shtesë në adoleshencë është e zakonshme për nënat. Në mesin e vajzave me një lindje të parë në moshën 14 vjeçe ose më të vogël, gati tre të katërtat kanë gjithashtu një lindje të dytë në adoleshencë dhe 40 për qind e atyre me dy lindje përparojnë në një lindje të tretë përpara se të dalin nga adoleshenca.
Sipas raportit, ndërlikimet nga lindja janë shkaku kryesor i vdekjes dhe lëndimit për vajzat adoleshente. Por të qenit nëna adoleshente mund të çojë gjithashtu në shkelje të tjera të rënda të të drejtave të tyre njerëzore dhe pasoja të rënda sociale, duke përfshirë martesën e fëmijëve, dhunën nga partneri intim dhe çështjet e shëndetit mendor.
Në të gjithë globin ka shenja inkurajuese të rënies së niveleve të mëmësisë në fëmijëri dhe adoleshencë. Por ritmi i rënies ka qenë jashtëzakonisht i ngadaltë, shpesh me vetëm rreth tre pikë përqindje në dekadë, sipas UNFPA.
Raporti parashtron rekomandime për politikëbërësit, duke përfshirë nevojën për t'u ofruar vajzave edukim seksual gjithëpërfshirës, mbështetje sociale dhe shërbime shëndetësore cilësore. Ai gjithashtu sugjeron t'u ofrohet familjeve mbështetje ekonomike dhe të angazhohen organizatat lokale brenda një politike dhe kuadri ligjor mbështetës që njeh të drejtat, kapacitetet dhe nevojat e adoleshentëve, veçanërisht vajzave adoleshente të margjinalizuara. (Elona)
