VCG
Presidenti rus, Vladimir Putin, tha se është e pamundur për disa shtete evropiane që të heqin dorë shpejt nga nafta ruse, ashtu siç po propozon Bashkimi Evropian.
Shtetet anëtare të BE-së po negociojnë mbi propozimin për vendosjen e embargos ndaj naftës së Rusisë, por gjatë kësaj jave bisedimet dështuan për shkak të vetos së Hungarisë, shtet që është shumë i varur nga importet e naftës ruse, bën të ditur “Radio Europa e Lirë”.
“Qartazi, disa shtete të BE-së nuk do të jenë në gjendje të heqin dorë për një kohë të gjatë nga nafta jonë”, -tha Putin.
Duke folur në një mbledhje me menaxherët vendorë të naftës dhe zyrtarët qeveritarë, Putin tha po ashtu se sanksionet perëndimore dhe mundësia e vendosjes së embargos ndaj naftës kanë rezultuar me ngritjen e çmimeve globale të naftës.
Ai tha se me heqjen dorë nga furnizimet e energjisë ruse, Evropa rrezikon të paguajë çmime më të shtrenjta për energjinë në terma afatgjatë, ndërkaq konkurrenca në këtë industri do të minohej.
Presidenti rus po ashtu tha se sanksionet perëndimore kanë nxitur rritje të inflacionit në mbarë Evropën.
Rusia po përballet me ulje të prodhimit të naftës, për shkak të sanksioneve të Perëndimit të cilat po komplikojnë shitjen e naftës ruse në botë.
“Ka ndryshime tektonike në tregun e naftës dhe bërja e biznesit si më parë duket e pamundur”, -tha Putin, duke shtuar se ishte shumë e rëndësishme që të krijohej një zinxhir që do të dërgonte produktin nga prodhuesi deri te blerësi.
Komisioni Evropian ka propozuar vendosjen e embargos ndaj naftës ruse dhe produkteve të rafinuara. Por, që një vendim i tillë të miratohet, kërkohet miratimi i të 27 shteteve të bllokut. Hungaria është shteti më i zëshëm kundër një embargoje të tillë.
