foto nga VCG
Rregullatori evropian i Barnave u dha dritën jeshile shteteve anëtare të BE-së për përdorimin e pilulës anti-Covid të “Pfizer”, si masë emergjente për të ndaluar një valë të re të sëmundjes, para se ky medikament të aprovohet formalisht për përdorim.
Gjiganti farmaceutik amerikan njoftoi këtë javë se pilula, një trajtim i ri që synon të përballojë variantin Omicron, ka ulur me rreth 90% numrin e shtrimeve në spital dhe vdekjeve te njerëzit me rrezik për sëmundje të rëndë, raporton “Radio Evropa e Lirë”.
“Produkti medicinal, që ende nuk është autorizuar në BE, mund të përdoret për të trajtuar të rriturit me Covid-19, të cilët nuk kanë nevojë për shtesa të oksigjenit dhe që janë në rrezik të shtuar për të kaluar në sëmundje të rëndë”, njoftoi EMA përmes një deklarate.
Trajtimi, i quajtur “Paxlovid”, është kombinim i dy tabletave që merren ndaras.
“Paxlovid duhet të administrohet sa më herët që është e mundur pas diagnostifikimit me Covid dhe brenda pesë ditësh nga nisja e simptomave”, -bëri të ditur EMA, duke shtuar se tabletat duhet të merren më pastaj edhe për pesë ditë të tjera.
Efektet më të shpeshta anësore janë humbja e shijes, diarre dhe të përziera.
Sipas njoftimit, ky ilaç nuk duhet të përdoret nga gratë shtatzëna dhe gjidhënia duhet të ndërpritet derisa merret terapia.
Deri më tani, EMA ka lëshuar një aprovim për përdorim të ngjashëm emergjent të pilulës të prodhuar nga rivali i “Pfizer”, “Merck”. (Irma)
