Eksportet e makinave britanike në Kinë rriten në vitin 2020 pavarësisht pandemisë Covid-19

Eksportet e makinave të Britanisë në Kinë treguan një rritje të lehtë në vitin 2020 nga shifrat e para-pandemisë në 2019-n, pavarësisht një rënieje të konsiderueshme në Bashkimin Evropian dhe Shtetet e Bashkuara të Amerikës.

Eksportet e makinave britanike kishin përjetuar tendencën rënëse në vitin 2019. Megjithatë, rënia në vitin 2020 ishte shumë më thelbësore, me vetëm 400.000 makina të vëllimit të eksportuara në BE në 2020-n krahasuar me 578.000 në vitin 2019, njoftoi Shoqëria Britanike e Prodhuesve dhe Tregtarëve të Motorëve (SMMT) në raportin e vet tregtar.

"Në krahasim, eksportet në Kinë treguan një rritje të lehtë nga shifrat e vitit 2019, një tregues se kërkesa në Kinë është atipike e pjesës tjetër të përvojës botërore, por gjithashtu se vendi po përjeton një rimëkëmbje më të shpejtë pas pandemisë, me Kinën që del nga bllokimi i saj më herët se kombet e tjera në botë dhe duke rigjallëruar kërkesën për automjete”, -thuhet në raport.

"Industritë automobilistike të Mbretërisë së Bashkuar dhe Kinës kanë forcuar lidhjet tregtare dhe investuese, duke krijuar një marrëdhënie që vazhdon të rrisë ekonomitë e të dy kombeve", -tha Mike Hawes, shefi ekzekutiv i SMMT, për “Xinhua”.

"Me Mbretërinë e Bashkuar një udhëheqëse botërore në inxhinierinë automobilistike, dizajnin dhe teknologjinë, dhe Kinën një lider global në prodhimin e automjeteve dhe me një strategji teknologjike gjithnjë e më të larmishme dhe inovative, ekziston një mundësi domethënëse për bashkëpunim të mëtejshëm midis dy vendeve”, -tha Hawes.

Përveç Kinës, raporti identifikoi Korenë e Jugut si një nga tregjet më të rëndësishme të rritjes në Azi, pasi regjistroi rritje të vogla në mënyrë të ngjashme.

Me tregun global të makinave që pritet të rritet ndjeshëm në rajone të tilla si Azia dhe Evropa Lindore, SMMT po bën thirrje që marrëveshjet e ardhshme tregtare të përfshijnë shtojca dhe dispozita të dedikuara automobilistike për të ulur tarifat dhe barrierat rregullatore.

Të ardhurat e Britanisë nga eksporti i automjeteve arritën në 27 miliardë paund (rreth 36.7 miliardë dollarë amerikanë) në vitin 2020.

Rreth gjysma e të gjitha makinave të prodhuara në Britani eksportohen në vendet anëtare të BE-së dhe pothuajse të gjitha furgonët e eksportuar nga vendi përfundojnë në rrugët evropiane. (Elona)