Sekretari i Përgjithshëm i Kombeve të Bashkuara, Antonio Guterres, bëri thirrje të martën për konsensus global mbi dhënien fund të krizës së biodiversitetit që ka kërcënuar mbijetesën e njerëzimit.
"Eksperimenti ynë dyshekullor me djegien e lëndëve djegëse fosile, shkatërrimin e pyjeve, shkretëtirës dhe oqeaneve dhe degradimin e tokës ka shkaktuar një katastrofë të biosferës", -tha Guterres në fjalimin e tij përmes një videoje në një konferencë të OKB-së të mbajtur në Kinë.
Takimi i 15-të i Konferencës së Palëve në Konventën e OKB-së mbi Diversitetin Biologjik, i njohur si COP15, filloi të hënën në Kunming, kryeqendra e provincës Yunnan të Kinës jugperëndimore.
Me temë "Qytetërimi ekologjik: Ndërtimi i një të ardhmeje të përbashkët për të gjithë jetën në tokë", pjesa e parë e konferencës do të zgjasë deri të premten, me aktivitete paralele që përfshijnë forume mbi tema përfshirë ndryshimet klimaterike dhe ruajtjen ekologjike, bën të ditur “Xinhua”. Pjesa e dytë e takimit, e cila pritet të mbahet vitin e ardhshëm, do të shqyrtojë dhe do të marrë një vendim mbi "kornizën globale të biodiversitetit pas vitit 2020", një plan për ruajtjen e biodiversitetit për dekadën e ardhshme.
Guterres falënderoi Kinën që priti takimin për të krijuar një kornizë, e cila identifikon objektivat për veprime urgjente.
"Ne kemi nevojë për veprime të guximshme”, -tha ai, duke bërë thirrje për mbështetje për të drejtën ligjore të të gjithë njerëzve, për të trajtuar nxitësit e humbjes së biodiversitetit, për të transformuar sistemet kombëtare dhe globale të kontabilitetit dhe mbështetje për vendet në zhvillim, duke përfshirë burime të konsiderueshme financiare dhe transferimin e teknologjisë.
Shefi i OKB -së e përshkroi ndërhyrjen e njerëzimit në natyrë si një "luftë vetëvrasëse" dhe theksoi se "ne po e humbim" atë.
"Shkalla e humbjes së specieve është dhjetëra deri në qindra herë më e lartë se mesatarja e 10 milionë viteve të fundit dhe po përshpejtohet. Mbi një milion lloje të bimëve, gjitarëve, zogjve, zvarranikëve, amfibëve, peshqve dhe jovertebrorëve janë në rrezik, shumë brenda dekadave", -tha Guterres. (Elona)
