Kina nxjerr masa për të nxitur konsumin dhe qarkullimin e automjeteve

Foto nga VCG

Kina ka zbuluar një sërë masash për të fuqizuar qarkullimin e automjeteve dhe për të rritur konsumin e automjeteve, pasi faktorë të shumtë kanë rënduar rëndë industrinë.

Ministria e Tregtisë dhe 16 departamente të tjera qeveritare kanë detajuar 12 masa specifike në gjashtë aspekte për të injektuar shtysë në sektorin e automjeteve, njoftoi zëvendësministri i Tregtisë Sheng Qiuping në një konferencë për shtyp të enjten, citon “Xinhua”.

Sipas tij, janë ndërmarrë hapa për të ndërtuar një treg të unifikuar kombëtar për automobilat, i cili bazohet në rregulla dhe përmban ndërlidhje, me përpjekje për të hequr proteksionizmin lokal në tregun e automjeteve me energji të re (NEV) dhe për të promovuar shitjet NEV në zonat rurale.

Po ashtu, sipas Sheng, do të bëhen përpjekje për të nxitur zhvillimin në shkallë të gjerë të tregut të makinave të përdorura. Ai theksoi se për automjetet e përdorura jotregtare, kufizimet për transferimin ndërrajonal të atyre automjeteve që plotësojnë standardin kombëtar të emetimeve të fazës 5 do të hiqen në mbarë vendin duke filluar nga 1 gushti.

Masa të tilla synojnë të nxisin qarkullimin efikas të automobilave në treg dhe të lehtësojnë funksionimin ndërrajonal të ndërmarrjeve të lidhura.

Më shumë ambiente parkimi do të ndërtohen në qytete dhe do të shtohen më shumë pajisje për karikimin e baterive në parkingje, stacione karburanti dhe zona shërbimi të autostradave, ndër pika të tjera, për të përmbushur kërkesat e karikimit të NEV-ve, vuri në dukje zëvendësministri.

Do të merren gjithashtu masa për të nxitur tranzicionin e gjelbër dhe me karbon të ulët të industrisë së automjeteve, me përpjekje për të stimuluar konsumin e NEV-ve dhe për të përmirësuar sistemin e riciklimit për automjetet e skrapuara.

Lëvizja për të çliruar potencialin e industrisë së automobilave është pjesë e politikave të Kinës që synojnë ruajtjen e stabilitetit ekonomik, tha Sheng, duke vënë në dukje se shitjet e automjeteve luajnë një rol jetik në rritjen e konsumit dhe stabilizimin e rritjes ekonomike. (Irma)