Foto： VCG
Anija kozmike kineze me ekuipazh “Shenzhou-14”, u transportua vertikalisht prej një rakete mbartëse “Marshimi i Madh-2F”, në pikën e nisjes në Qendrën e Lëshimit të Satelitëve të Jiuquan-it në Kinën Veriperëndimore të dielën, bëri të ditur Zyra e Inxhinierisë së Fluturimeve Hapësinore me Astronautë e Kinës (CMSEO).
Anija kozmike me ekuipazh “Shenzhou-14” do të dërgojë tre astronautë në modulin kryesor “Tianhe” të stacionit hapësinor të Kinës në qershor për një mision gjashtëmujor, tha Huang Weifen, kryeprojektuesi i sistemit të astronautëve në projektin e fluturimeve hapësinore me astronautë të Kinës, në një konferencë shtypi në 17 prill.
Kombinimi i anijes kozmike dhe raketës, i cili peshon 39 tonë dhe ka një lartësi të përgjithshme prej afro 60 metrash, doli ngadalë nga ndërtesa e provës së montimit përfundimtar dhe iu afruar kullës së nisjes, pasi udhëtoi 1.5 kilometra në hekurudhën e ndërtuar posaçërisht për të parandaluar dridhjet. Pas rreth një ore e gjysmë, kombinimi u afrua më pranë kullës së nisjes dhe platforma rrotulluese u mbyll ngadalë.
Të gjitha objektet dhe pajisjet në qendrën e nisjes janë në gjendje të mirë tani dhe kontrollet e ndryshme funksionale e testet e përbashkëta para nisjes do të kryhen siç është planifikuar, njoftoi CMSEO.
Zhang Fusheng, kryeprojektuesi për sistemin e anijeve kozmike me astronautë, i tha Grupit Mediatik të Kinës (CMG): "Ne kemi kryer të gjitha montimet përfundimtare dhe testet, duke përfshirë mbushjen me lëndën shtytëse të anijes kozmike. Do të zhvillojmë një test në shkallë të gjerë të ndërfaqes së sistemit lidhur me sistemin e raketës dhe më pas do të vazhdojmë me një provë të të tërë sistemit, që shënon hyrjen e kombinimit në statusin e paralëshimit."
