Foto: VCG
Postimet në mediet sociale për një kurs gatimi për fëmijët e shkollës, si pjesë e një programi të rinovuar të aftësive jetësore, që do të ofrohet në mbarë vendin këtë shtator, u bënë virale në internet. Ajo u bë shpejt tema kryesore në trend në “Weibo”-n e Kinës, një platformë e ngjashme me “Twitter”, duke ndezur diskutime të nxehta midis përdoruesve të rrjetit për programin e ardhshëm shkollor.
Përmbajtja e postimeve të mediave sociale bazohet në një standard të ri të kurrikulës kombëtare për arsimin e detyrueshëm, i paraqitur nga Ministria e Arsimit e Kinës (MOE), e cila përshkruan kurse të ndryshme gatimi dhe ushqimi për nxënësit e klasave të ndryshme.
Rekomandohet që nxënësit e klasës së parë dhe të dytë të mësojnë se si të qërojnë frutat dhe të krijojnë çaj dhe të fitojnë njohuri bazë të të ushqyerit, si dhe aftësinë për të marrë pjesë në gatimin bazë në shtëpi. Niveli është vendosur më i lartë për nxënësit e klasave të pesta dhe të gjashta, të cilët pritet të fitojnë aftësitë bazë të gatimit si skuqja dhe zierja dhe të jenë në gjendje të përgatisin një vakt për familjet e tyre.
Përveç aftësive thelbësore si gatimi dhe mirëmbajtja e shtëpisë, programi është krijuar gjithashtu për të pasuruar njohuritë dhe aftësitë e tyre në punën e prodhimit, si dhe në shërbime.
“Nëpërmjet mësimeve dhe përvojës, nxënësit mësojnë respektin për punën, aftësinë për të marrë njohuri të reja dhe për t’i zbatuar ato në jetën reale, si dhe një ndjenjë përgjegjësie sociale”, -bëri të ditur Ministria e Arsimit.
Shumë përdorues të internetit e përshëndetën programin e aftësive për jetën dhe shprehën mbështetje për ndryshimin e modelit të edukimit. “Kjo duhet të ishte bërë më herët. Fëmijëve në ditët e sotme u mungojnë aktivitetet e duhura fizike dhe mezi dallojnë grurin nga orizi. Aftësitë e tyre në jetën e përditshme nuk janë aspak të kënaqshme”, -komentoi një përdorues në “Douyin”, versioni kinez i “TikTok”. Deri më tani komenti ka marrë mbi 24.000 pëlqime dhe afro 500 përgjigje.
“Jeta ka të bëjë me të mësuarit. Mençuria dhe karakteri i fëmijëve formohen ndërsa përballen me sfida të njëpasnjëshme të jetës”, -komentoi një përdorues i “Weibo”.
Megjithatë, disa përdorues të internetit shprehën shqetësimin se duke mos qenë një kurrikulë bazë, programi nuk mund të zbatohet plotësisht në shkolla. Ndërsa të tjerë janë të shqetësuar se programi thjesht do të sjellë një barrë shtesë për prindërit.
“Shkollat duhet të marrin një rol drejtues në mësimin e aftësive të jetës, ndërsa familjet duhet të luajnë një rol mbështetës. Shkollat, familjet dhe shoqëria duhet të punojnë së bashku për të promovuar arsimin”, -tha Gu Jianjun, një zyrtar i Ministrisë së Arsimit.
Gu theksoi ndër të tjera se prindërit duhet të inkurajojnë fëmijët e tyre që të angazhohen në mënyrë aktive dhe të bashkëpunojnë me shkollat për t'i udhëhequr ata në praktikimin e aftësive të jetës. “Kështu duhet të jetë shkollimi”, -thuhet në një koment tjetër nga një përdorues i rrjetit, që mori rreth 32.000 pëlqime.
