20140424Palimsest1 |
Festivali ndërkombëtar i filmit në Pekin
Ky event i rëndësishëm kulturor ka startuar në vitin 2011 në kujdesin e Administratës Shtetërore të Radios, Filmit dhe Televizionit në Pekin, në bashkëpunim me Bashkinë e kryeqytetit kinez. Në kuadër të festivalit zhvillohen takime të shumta mes producentëve të filmave, institucioneve kinematografike por dhe mes aktorëve vendës dhe të ftuar nga bota. Më 16 prill u zhvillua ceremonia e hapjes së Festivalit në Qendrën Kombëtare për performimin e arteve në Pekin. Rreth 30 salla kinemash në mbarë Pekinin shfaqën filmat e nominuar të këtij festivali. Përsa i përket shfaqjes së filmave ato janë ndarë sipas kategorive. Filmi i parë i shfaqur në festival ishte ai me titull "E bukura dhe bisha" i regjizorit francez Cristophe Gans ku interpreton aktorja e re Léa Seydoux. Festivali u zhvillua nga 16-23 prill.
Filmat e nominuar
Në festivalin e 4-të të filmit në Pekin konkuruan 15 filma për çmimin e madh "Tiantan" që quhet i tillë sipas emrit të monumentit të njohur të Pekinit "Tempulli i Qiellit". Në listën e filmave të nominuar të festivalit përfshihen dhe prodhimet kinematografike kineze "Mjeshtri i madh" me regji të Wong Kar-wai dhe "Ëndrra amerikane në Kinë" me regji të Peter Chan. Në garë për çmimin Tiantan janë dhe prodhime të kinemasë italiane, greke, australiane, sllovene etj.
Çmimet e festivalit
Janë të shumtë çmimet e festivalit, ndër të cilët "Regjizori më i mirë", "Skenari më i mirë", "Aktori më i mirë", "Aktorja më e mirë", "Aktori më i mirë joprotagonist", "Aktorja më e mirë jo protagoniste", "Fotografia më e mirë", "Muzika më e mirë e filmit" si dhe "Efektet më të mira".
Fituesit e Festivalit u shpallën në ceremoninë e mbylljes së tij në mbrëmjen e 23 prillit.
Juria e festivalit
Juria e edicionit të 4-të të Festivalit ndërkombëtar të filmit në Pekin përbëhej nga 7 anëtarë me në krye regjizorin John Woo. Ndër anëtarët e jurisë ishte aktorja italiane Maria Grazia Cucinotta, e njohur për publikun kinez të kinemasë prej bashkëprodhimit kino-italian "Gjithmonë ka një arësye", ku interpreton dhe aktori i njohur kinez Huang Haibo. Ajo ka deklaruar për mediet që shoqëruan festivalin se " ka përjetuar emocione të forta gjatë përzgjedhjes së filmave fitues". Një tjetër anëtar i jurisë së festivalit është producenti i njohur spanjoll Andres Vicente Gomez, president i njërës prej kompanive më të njohura të produksionit të filmit në Spanjë, i cili po zhvillon me këtë rast vizitën e tij të parë në Kinë.
Ai tha në konferencën për shtyp të festivalit se " ka marrë pjesë në shumë festivale filmash nëpër botë dhe nuk janë të paktë, por 2800 festivale. Çdo ditë zhvillohen 5-6 festivale filmash në botë. Por vetëm 10 prej tyre kanë tërhequr vemendjen e opinionit publik", thotë Gomez. Anëtarë të tjerë të jurisë ishin regjizori Lu Chuan, regjizori irlandez Jim Sheridan.
I pranishëm në ceremoninë e hapjes së Festivalit ndërkombëtar të filmit në Pekin ishte dhe aktori i njohur francez Jean Reno, regjizori kinez Zhang Yimou dhe aktorët kinezë të njohur për publikun ndërkombëtar Zhang Ziyi, Fan Binbing, Yang Shuting, Huang Xiaoming etj.
Festivali i 4-të i filmit në Pekin u zhvillua me moton " Ndaj ekranin, ndaj të ardhmen!" (Eda Merepeza)