Fuqitë e mëdha ranë dakord të kërkojnë një 'armëpushim kombëtar' në Siri dhe zbatimin e tij brenda një jave, thanë diplomatët që po marrin pjesë në takimin e Grupit Mbështetës të Sirisë në Munih të Gjermanisë.

Gjithashtu ata thanë se kanë rënë dakord për të lehtësuar dërgimin e ndihmave humanitare në Siri dhe njëherësh bënë thirrje për rifillimin e bisedimeve të paqes në Gjenevë.

Sekretari amerikan i Shtetit John Kerry tha se armëpushimi afatgjatë varet nga vullneti i secilës palë që është e përfshirë në luftën civile të Sirisë për t'u përfshirë në "bisedime të mirëfillta".

Në takimin e zhvilluar në Munih, me diplomatë nga Shtetet e Bashkuara, Rusia, Kina, Kombet e Bashkuara dhe fuqitë e tjera, u ra dakord zbatimi i "ndërprerjes së luftimeve" brenda një jave.

Sekretari Kerry tha se "qëllimi është arritja e një armëpushimi afatgjatë dhe të qëndrueshëm," por theksoi se çdo gjë do të varet nga bisedimet në të ardhmen. (Leftion Peristeri)