Presidenti i Francës Francois Hollande riorganizoi kabinetin qeveritar të enjten. Në postin e kryeministrit mbetet Manuel Valls, ndërsa ishkryeministri Jean-Marc Ayrault u emërua ministër i jashtëm, në vend të Laurent Fabius, të dorëhequr.
Pallati presidencial francez përmes një deklarate për shtyp të enjten bëri të ditur se qeveria e re përbëhet nga 18 ministra dhe 20 sekretarë shteti, duke u shtuar me 6 anëtarë, krahasuar me kabinetin e mëparshëm.
Pas publikimit të kabinetit të ri qeveritar, kreu i tij Valls tha se është një staf me përvojë dhe bazë të gjerë politike.
Sipas medias franceze, qeveria e re ka pranuar në gjirin e saj politikanë të Partisë së Gjelbër dhe partive të majta radikale për të forcuar pushtetin e Partisë Socialiste të presidentit Hollande, me synim fitoren në zgjedhjet presidenciale dhe parlamentare të vitit 2017.