Autoritetet e turizmit të Koresë së Jugut shpresojnë të tërheqin më shumë vizitorë kinezë, për të përmirësuar shifrat në rënie të turizmit në këtë vend.

Kim Jong, zëvendësministri koreanojugor i Kulturës, i Sporteve dhe i Turizmit, ndodhet në Pekin në një tur promocional.

"Me qëllim për të rimëkëmbur tregun e turizmit, qeveria e Koresë së Jugut i ka përjashtuar turistët kinezë nga pagesa e tarifës së vizës dhe i ka thjeshtuar procedurat e uljes së taksave për ta," u shpreh Kim.

Kina është vendi me numrin më të madh të turistëve në Korenë e Jugut.

Vitin e kaluar rreth 6 milion veta udhëtuan nga Kina për në Korenë e Jugut. Megjithatë, numri i turistëve kinezë në Korenë e Jugut ra me rreth 50 për qind në qershor dhe korrik, për shkak të shpërthimit të MERS-it. (Artan Goga)