Gjenerali kinez në pension Guo Boxiong, u përjashtua nga Partia Komuniste pasi akuzohet për marrje ryshfeti, pas vendimit të marrë nga Byroja Politike e Komitetit Qendror të enjten.

Byroja vendosi t'ia kalojë çështjen prokurorisë ushtarake ashtu siç e parashikon dhe ligji.

73-vjeçari Guo, ka shërbyer si zv./kryetari i Komisionit Qendror Ushtarak nga viti 2002 deri në vitin 2012.

Vendimi i Byrosë erdhi pas rishikimit dhe miratimit të raportit hetimor të paraqitur nga autoriteti disiplinor i partisë.

Hetuesit vërtetuan se Guo përfitoi nga posti që mbante për të ngritur në hierarkinë ushtarake të tjerë si dhe ka pranuar ryshfet personalisht ose nëpërmjet familjes së tij, thekson një deklaratë e lëshuar pas mbledhjes.

"Veprimet e tij kanë thyer seriozisht disiplinën e partisë duke lënë pas pasoja të turpshme," thekson dokumenti. Guo u vu nën hetim më 9 prill. (Leftion Peristeri)