Autoritetet franceze thanë se krahu i avionit të gjetur që dyshohet se i përket avionit "Malaysian Arlines", fluturimit MH370, do të transportohet në Toulouse të Francës për një hetim të hollësishëm.
Ata shtuan se transporti i mbejtjes mund të kërkojë disa ditë deri në destinacionin përfundimtar, ndërkohë që një grup hetuesish nga Malajzia janë drejtuar drejt Toulouse-s.
Ekspertët besojnë që ajo është një pjesë e Boeing 777, e njëjtë me MH370-n, por për t'u siguruar plotësisht kërkohen më shumë hetime.
Eksperti i aviacionit Geoffrey Thomas tha se numrat serial të mbetjes së gjetur do të ndihmojnë në identifikimin e objektit, nëse i përket ose jo avionit të humbur "Malaysia Airlines".
"Në aviacion, çdo pjesë e avionit, miliona pjesë, kanë numër serie. Prandaj tek mbetja e gjetur patjetër që do të ketë shenja që do të tregojnë se ky Boeing i përket 777 dhe nëse është nga MH370."
Avioni u zhduk më 8 mars 2014 gjatë fluturimit nga Kuala Lumpur drejt Pekinit.
Në bordin e avionit ishin 239 pasagjerë dhe anëtarë të ekuipazhit. Pjesa më e madhe e tyre ishin shtetas kinezë.
Ndërkohë, qeveria kineze ka deklaruar se po e ndjek me vëmendje situatën.