Atasheu ushtarak i ambasadës së Kinës në Tiranë, koloneli i lartë Luo Tiefeng shtroi një pritje me rastin e 88 vjetorit të themelimit të ushtrisë së vendit, ku morën pjesë ambasadorja Jiang Yu dhe atashetë ushtarakë të vendeve të tjera në Shqipëri, si dhe emigrantë kinezë që jetojnë aty.

Nga pala shqiptare, ishin të pranishëm zv/ministri i Mbrojtjes Petro Koçi, sekretari i Shtabit të Përgjithshëm, Nazmi Cahani, zv/komandanti i forcës tokësore gjeneral brigade Muhamet Buçpapa, anëtarët e Grupit të Miqësisë Shqipëri-Kinë në parlament dhe personalitete të shoqërisë civile shqiptare.

"Kina ka bërë sakrifica dhe ka dhënë kontribut të jashtëzakonshëm në luftën antifashiste si fushëbeteja kryesore në Azi," tha atasheu Luo Tiefeng.

Sipas tij, ushtria kineze po merr pjesë aktivisht në misionet paqeruajtëse dhe luftën kundër terrorizmit, duke luajtur një rol pozitiv për mbrojtjen e paqes dhe të sigurisë botërore.

"Ushtria kineze dëshiron që të forcojë më tej besimin reciprok me Shqipërinë, për zhvillimin e bashkëpunimit konkret në fushën e prapavijës, të trajnimit të misioneve paqeruajtëse etj," tha Luo.

Në pritje u transmetua një film dokumentar dhe u zhvillua një ekspozitë fotografike për zhvillimin e forcave ushtarake të Kinës dhe paraqitjen e tyre në misionet jashtë vendit.

Pjesëmarrësit shprehën urimet dhe dëshirën për forcimin e bashkëpunimit midis dy vendeve. (Leftion Peristeri)