Komisioni Europian miratoi të martën një akt ligjor për krijimin e një sistemi doganor "më të thjeshtë, më modern dhe të integruar" në BE, në mbështetje të tregtisë ndërkufitare dhe sigurimin e një bashkëpunimi më të gjerë në çështjet doganore.

Sipas Komisonit, akti mbulon një hapësirë të gjerë të veprimtarisë doganore, përfshi thjeshtimin e procedurave, qartësimin e rregullave për të siguruar barazi mes operatorëve ekonomikë në BE etj.

Akti përfshin gjithashtu shkëmbimin e informacionit mes doganeve të vendeve anëtare dhe përmirësimin në menaxhimin e riskut për të forcuar luftën kundër tregtisë së paligjshme dhe të mallrave të ndaluara, terrorizmit dhe veprimtarive të tjera kriminale.

Akti pritet të shqyrtohet nga Parlamenti dhe Këshilli Europian.

Në doganën e BE-së është regjistruar 16 për qind e tregtisë botërore, ose mbi 2 miliardë ton mallra në vit me një vlerë 3,400 miliardë euro.