Zëvendëspresidenti i ShBA-së Joseph Biden premtoi të hënën mbështetje të plotë për forcat irakiane për të rimarrë territore të pushtuara nga Shteti Islamik.
Gjatë një telefonate me kryeministrin irakian Haider al-Abadi, Baiden premtoi "mbështetje të plotë" për çlirimin e Irakut, duke përfshirë 'dhënien e përshpejtuar të trajnimit dhe pajisjeve."
Uashingtoni po nxiton të dërgojë në Bagdad 1,000 raketa kundër tank, pasi Shteti Islamik mori kontrollin e plotë të qytetit Ramadi, kryeqendrës së krahinës Anbar që është më e madhja e Irakut, duke përdorur makina bombë dhe mjete të tjera.
Sekretari amerikan i Mbrojtjes Ash Carter fajësoi për rënien Ramadi mungesën e vullnetit nga ana e forcave irakiane për të luftuar Shtetin Islamik.
Kryeministri Al-Abadi i tha BBC-së të hënën se ishte "habitur" nga komentet e Carter, duke u zotuar për të nisur një së shpejti kundërofensivë për të rimarrë qytetin Ramadi. (Leftion Peristeri)