Me rastin e 40-vjetorit të vendosjes së marrëdhënieve diplomatike Kinë-BE, zv.kryetarja e Komisionit Europian dhe përfaqësuesja e Lartë për Politikën e Jashtme dhe të Sigurisë Federica Mogherini ka bërë një vizitë zyrtare në Kinë. Në pritjen e dhënë të mërkurën nga ambasadori i BE-së në Kinë Hans Dietmar Schweisgut, znj. Mogherini u shpreh se, gjatë 40 vjetëve të vendosjes së marrëdhënieve diplomatike mes tyre, Kina dhe BE-ja kanë dëshmuar zhvillimin e njëra-tjetrës. Sipas saj, të dyja palët duhet të forcojnë besimin e ndërsjellë dhe bashkëpunimin në fusha të ndryshme.
Numri dy i Komisionit Europian vuri në dukje se gjatë 40 vjetëve që prej vendosjes së tyre, marrëdhëniet Kinë-BE kanë ardhur duke u bërë gjithnjë e më të pjekura. Të dyja palët kanë krijuar një kornizë të fortë dialogu për tema dhe në nivele të ndryshme. Pekini dhe Brukseli kanë qenë plotësisht të ndërgjegjshëm për rëndësinë e veprimit të tyre të përbashkët në sfidat rajonale e botërore dhe në çështje të ndryshme, për të mirën e popujve të tyre.
Znj. Mogherini vuri në dukje po ashtu se vizitat dhe takimet e udhëheqësve të të dy palëve kanë nxitur zhvillimin e marrëdhënieve politike Kinë-BE, duke forcuar bashkëpunimin dypalësh dhe duke e zgjeruar atë në fusha të reja.