ShBA-ja dhe Japonia kanë përgjegjësinë që aleanca e tyre të mos cenojë interesat e palëve të treta, duke përfshirë Kinën, dhe të mos dëmtojë paqen e qëndrueshmërinë në Azi-Paqësor, u shpreh të martën në një konferencë shtypi zëdhënësi i Ministrisë së Jashtme të Kinës Hong Lei.

Të hënën u zhvillua takimi i ministrave të jashtëm dhe të mbrojtjes të ShBA-së dhe Japonisë. Të dy palët publikuan "Udhëzimet për bashkëpunimin në mbrojtje" të rishikuara, ku deklarohet se do të hiqen kufizimet gjeografike në bashkëpunimin amerikano-japonez në fushën e sigurisë. Ministrat e jashtëm të të dy vendeve theksuan se "Traktati i sigurisë" mes ShBA-së dhe Japonisë është i zbatueshëm edhe për ishujt Diaoyu.

Duke komentuar lidhur me këtë çështje, zëdhënësi i Ministrisë së Jashtme të Kinës Hong Lei u përgjigj se aleanca amerikano-japoneze është krijuar në periudhën e Luftës së Ftohtë. Në kohët e sotme, kur Lufta e Ftohtë ka mbaruar, zhvillimi i këtij aleance ka sjellë vëmendjen e palëve të ndryshme.

Hong Lei bëri të ditur se pala amerikane e ka njoftuar Pekinin para publikimit të "Udhëzimeve" të reja, duke shtuar se Kina ka ritheksuar qëndrimin e vet të vendosur lidhur me probleme të tilla si ishujt Diaoyu etj. (Xu Guang/Artan Goga)