Kryeministri turk Ahmet Davutoglu deklaroi të mërkurën se Turqia nuk do të mbyllë kufijtë e saj me Sirinë, pavarësisht fluksit të luftëtarëve të huaj, pasi shumë sirianë të pafajshëm i drejtohen Turqisë fqinje për të shpëtuar nga konflikti në vend.

"Populli turk i ka pritur krahëhapur sirianët e pafajshëm. Ndaj ne nuk do të mbyllim kufijtë për ta. Këta njerëz po i largohen regjimit sirian, armëve kimike dhe Shtetit Islamik (IS)", theksoi Davutoglu, gjatë konferencës së përbashkët për shtyp me homologun australian Tony Abbott, i cili ndodhet për vizitë zyrtare në Ankara.

Sipas Davutoglu, IS paraqet një rrezik të madh ndaj Turqisë, krahasuar me vendet e tjera dhe u shpreh se vendi i tij nuk dëshiron të shohë asnjë luftëtar të huaj të kësaj organizate në territorin e vet apo në Siri.

Ai shprehu gatishmërinë e Turqisë për bashkëpunim në luftën kundër Shtetit Islamik.

Të dy kryeministrat dhanë një deklaratë për luftë të përbashkët kundër grupeve terroriste, përfshirë IS-in, duke u zotuar për bashkëpunim kundër kërcënimit terrorist, bllokimit të burimeve të financimit të organizatave terroriste dhe për ekstradimin e luftëtarëve të huaj. (Eda Merepeza)