Me anë të një rezolute të miratuar njëzëri të premten, Këshilli i Sigurimit i OKB-së i kërkon vendeve anëtare të luftojnë terrorizmin në Libi. Në deklaratën e Këshillit të Sigurimit theksohet se " vendet anëtare duhet të luftojnë " me të gjitha mjetet" kërcënimet ndaj paqes dhe sigurisë nga aktet terroriste, përfshirë ato të kryera nga Shteti Islamik (IS), grupet aleate të tij, Ansal al-Sharia si dhe shoqata të lidhura me al-Qaida-n, që veprojnë në Libi.
Duke shprehur shqetësimin lidhur me ndikimin negativ të pranisë së këtyre grupeve në Libi dhe rajon, Këshilli i Sigurimit i OKB-së thekson nëpërmjet rezolutës, nevojën e një lufte gjithëpërfshirëse kundër terrorizmit.
Në këtë drejtim kërkohet zbatimi i plotë i rezolutave, përfshirë ato që lidhen me grupet terroriste të sipërpërmendura. (Eda Merepeza)