Duke folur për situatën e përkeqësuar në Jemen, zëdhënësja e Ministrisë së Punëve të Jashtme të Kinës Hua Chunying shtjelloi të premten në Pekin qëndrimin parimor të palës kineze.

"Pala kineze ka qenë gjithnjë pro zgjidhjes politike për të gjitha çështjet e nxehta. Kina bëri thirrje që të zbutet kriza sipas rezolutës përkatëse të Këshillit të Sigurimit dhe në bazë të propozimit të Këshillit të Bashkëpunimit të Gjirit Persik (GCC), që të rivendoset rendi normal dhe ligjor në Jemen."

Duke iu përgjigjur pyetjes se a planifikon Kina të tërheqë shtetasit e saj nga Jemeni, zëdhënësja Hua tha:

"Qeveria kineze i ka kushtuar vëmendje të madhe sigurisë së shtetasve dhe institucioneve kineze në Jemen dhe do të marrë masat e duhura për të garantuar sigurinë e tyre."

Ditët e fundit, Arabia Saudite dhe vendet e tjera të Gjirit Persik ndërmorrën sulme ajrore kundër grupit të armatosur Houthi, që kanë vrarë shumë veta.

Ambasadori i Kinës në Jemen Tian Çi u shpreh të enjten se aktualisht institucionet diplomatike kineze në Jemen funksionojnë normalisht dhe po punohet për garantimin e sigurisë së ndërmarrjeve e grupeve mjekësore kineze në këtë vend. (Wang Lei/ Albana)