Fjala kyçe: 困境---Kùn Jìng---Gjendje e vështirë

Në konferencën vjetore për shtypin, presidenti i Rusisë Vladimir Putin u ndal më gjatë tek gjendja ekonomike, çështjet e brendshme dhe ato diplomatike. Ditët e fundit, monedha ruse, rubla, është duke zhvlerësuar me shpejtësi duke vënë ekonominë përballë një krize të rëndë. Presidenti Vladimir Putin vuri në dukje se kjo krizë shkaktohet nga elementet e jashtme. Ai shprehu gjithashtu bindjen e tij se vendi do të dalë nga gjendja e vështirë brenda dy vjetësh.

Gjatë takimit me korrespondentët, pyetja e parë për shefin e Kremlinit ishte nëse vërtet Rusia do të dalë nga vështirësia ekonomike brenda dy vjetësh, siç dëshiron vetë presidenti. Në përgjigjen Putini tha se Rusia duhet të ambientohet gradualisht me çmimin e ulët të naftës.

"Pse unë jam optimist? Sepse ekonomia jonë kërkon kohë të ambientohet gradualisht me situatën e çmimit të ulët të naftës. Nëse në të ardhmen çmimi do të jetë në nivelin e sotëm, ose më i ulët sesa 60 dollarë apo 40 dollarë për fuçi, për ne kjo nuk ka rëndësi, ajo që duhet të bëjmë është rregullimi i strukturës ekonomike."

Putini shtoi se vendi i tij kushton rëndësi të madhe bashkëpunimit me vendet e Azi Paqësorit. Rusia ka hartuar politika që theksojnë rëndësinë me Lindjen, por jo nga këndvështrimi politik, por nga ai i gjendjes së sotme globale.

"Zhvillimi (ekonomik) në rajonin e Azi Paqësorit ka tejkaluar rajone të tjera të botës, ndaj ka shanse të rinj. Po rriten shpejt kërkesat për energji në Kinë, Indi, Japoni dhe Korenë e Jugut. Ky rajon po zhvillohet më shpejt sesa rajone të tjera, pse Rusia duhet t'i refuzojë raste të tilla? "

Kur foli rreth marrëdhënieve ruso-kineze, Putini u shpreh se Kina dhe Rusia mund të zgjerojnë bashkëpunimin dhe se të dy vendet kanë interesa të përbashkët. Ai theksoi gjithashtu se marrëveshja e gazit natyror me Kinën nuk do të sjellë humbje ekonomike për Rusinë, por do t'u bëjë mirë të dy palëve.

"Mekanizmi i vendosjes së çmimit midis Kinës-Rusisë nuk ndryshon shumë nga ai midis Rusisë dhe BE-së. Krahas kësaj, Rusia mund të përfitojë që nga fillimi i zbatimit të programit të bashkëpunimit energjetik me Kinën, përndryshe, nuk do ta zgjidhë çështjen e gazit natyror në Lindjen e Largët dhe Siberinë Lindore. Do të jetë absolutisht fitimprurëse për ne."

Kur komentoi marrëdhëniet me vendet perëndimore, presidenti rus tha se gjendja e vështirë përballë Rusisë shkaktohet jo vetëm nga çështja e Krimesë, por nga qëndrimi ekskluziv dhe përjashtimi i vazhdueshëm i Rusisë nga Perëndimi.

"Problemi është se a dëshirojmë ne marrëdhënie të barabarta partneriteti me Perëndimin? Përgjigja është po, mirëpo kjo duhet bazuar në respektimin pa kushte të interesave ruse në fushën e sigurisë dhe të ekonomisë."

Putini shprehu këmbëngulje mbi çështjen e Ukrainës. Ai tha se Rusia shpreson të luajë rolin e ndërmjetësuesit në dialogun politik të Ukrainës, të nxisë zgjidhjen e krizës, si dhe të ofrojë ndihma për banorët e pjesës lindore të Ukrainës dhe të garantojë interesat e tyre.

"Një gjë është e qartë, nëse Ukraina kërkon rikthimin e paqes dhe garantimin e tërësisë territoriale, ajo duhet të respektojë vullnetin e popullit në disa rajone. Të zhvillojë dialog të hapur politik me ata dhe të mos ushtrojë tension," tha Putin. (Wang Xianya)