Presidenti rus Vladimir Putin është shprehur se Shtetet e Bashkuara po destabilizojnë rendin botëror, duke u përpjekur të imponojnë vullnetin e tyre. Putini po ashtu paralajmëroi se bota do të përballet me luftëra të reja nëse Uashingtoni nuk respekton interesat e vendeve të tjera.
Në një fjalim para ekspertëve politikë në Soçi të Rusisë të premten, kreu i Kremlinit tha se luftërat në Irak, Libi dhe Siri janë shembuj të politikave të dështuara amerikane që kanë çuar në kaos.
Lidhur me Ukrainën, Putini e akuzoi Perëndimin për shpërfilljen e interesave të ligjshme të Rusisë dhe mbështetjen për largimin e ish-presidentit ukrainas Viktor Janukoviç.
Kriza e Ukrainës i ka çuar marrëdhëniet Rusi-Perëndim në nivelin e tyre më të ulët që nga Lufta e Ftohtë.
ShBA-ja dhe Bashkimi Evropian kanë vendosur disa raunde sanksionesh kundër Rusisë për aneksimin e Krimesë në mars dhe rolin që ka luajtur në kryengritjen e armatosur në Ukrainën Lindore. (Artani)