Të paktën 22 njerëz u vranë dhe 25 të tjerë u plagosën si pasojë e një sulmi terrorist në një xhami Shiite në kryeqytetin irakian Bagdad mbrëmjen e së dielës, njoftoi policia.
Një terrorist i veshur me një jelek me eksploziv hodhi veten në erë në Abbas al-Adly, një xhami Shiite, në zonën Harithiya në perëndim të Bagdadit, duke shkaktuar 22 viktima, dhe duke plagosur disa të tjerë, sipas burimeve të Ministrisë së Brendshme të Irakut.
Bëhet e ditur gjithashtu se bilanci i viktimave mund të rritet, ndërkohë që ambulancat dhe automjetet e policisë vazhdojnë të evakuojnë rastet në spitale.
Iraku po përballet me valën më të egër të dhunës ndër vite. Terrorizmi dhe dhuna kanë vrarë 5,576 civilë në Irak në pjesën e parë të vitit, si dhe janë regjistruar 11,666 të plagosur, sipas raportit të fundit të Kombeve të Bashkuara. (Albana)