Mediet amerikane raportuan ditën e djeshme se presidenti amerikan Barak Obama ka autorizuar fluturimet e survejimit mbi Siri, duke u konsideruar si një parapërgatitje për sulme ajrore ndaj organizatës ISIS në territorin sirian.
E përditshmja amerikane "New York Times" citoi fjalët e një zyrtari të lartë amerikan se presidenti Obama e miratoi këtë mision fundjavën e kaluar. Departamenti amerikan i Mbrojtjes deklaroi se do të vihen në përdorim avionët pa pilot dhe ata të tipit U2. Misioni do të zhvillohet në zonat kufitare mes Irakut dhe Sirisë, dhe jo brenda Sirisë.
Uashintoni ka reaguar ashpër pas publikimit të videos së ekzekutimit të gazetarit amerikan nga ISIS. Më pas, Obama u bëri thirrje vendeve të Lindjes së Mesme të punojnë së bashku për eliminimin e ISIS nga rajoni. (Jiang Lei)