Një aeroplan udhëtarësh i kompanisë shtetërore algjeriane "Air Algerie" është zhdukur të enjten 50 minuta pas ngritjes nga aeroporti "Ouagadougou" i Burkina Fasos, njoftoi agjencia zyrtare e lajmeve APS.

"Shërbimet e navigimit ajror të 'Air Algerie' kanë humbur kontaktin të enjten me aeroplanin e fluturimit AH 5017 nga Ouagadougou në Algjer, rreth orës 01:55 të mëngjesit, ose 50 minuta pas ngritjes," citon APS një deklaratë të "Air Algerie".

"Në përputhje me këto zhvillime, kompania ka nisur planin e reagimit emergjent," thotë deklarata.

Në deklaratë nuk bëhet e ditur se sa njerëz ishin në aeroplanin e zhdukur, por TSA njofton se aeroplani ishte një Airbus A320 me 110 udhëtarë. (Artani)