Komandanti i Përgjithshëm i Marinës në Ushtrinë Çlirimtare Popullore të Kinës, Wu Shengli bëri thirrje për thellimin e besimit mes udhëheqësve të forcave detare të vendeve të ndryshme, të shmangin përllogaritjet e gabuara dhe të menaxhojnë konfliktet. Wu e bëri këtë apel të martën gjatë Simpoziumit Detar të vendeve të Paqësorit Perëndimor (WPNS), që zhvillon punimet në qytetin port kinez të Qingdaos.

Sipas tij duhet të institucionalizohen shkëmbimet e vizitave mes drejtuesve të forcave detare, të shtohet dialogu, shkëmbimet e përvojave si dhe të konsolidohet besimi i ndërsjelltë. Kreu i Forcave Detare të Kinës bëri thirrje për rritjen e bashkëpunimit, duke përfshirë dhe operacionet e emergjencës dhe të shpëtimit. Si dëshmi e këtij bashkëpunimi ai përmendi koordinimin e punës mes forcave detare të vendeve të Paqësorit Perëndimor, gjatë operacioneve të kërkimit të avionit të humbur MH370 dhe gjatë mbytjes së tragetit jugkorean ditët e fundit.

Kjo është hera e parë që Kina, një nga 12 vendet anëtare dhe themeluese të Simpoziumit Detar të Paqësorit Perëndimor, bëhet mikpritëse e këtij takimi. (Eda Merepeza)