Rreth 600 trupa të Ushtrisë amerikane pritet të mbërrijnë në Poloni dhe në tre vende balltike në ditët e ardhshme për nisjen e një stërvitjeje ushtarake, njoftoi të martën zëdhënësi i Pentagonit, John Kirby.
Ky veprim konsiderohet si një hap që synon të sigurojë aleatët e NATO-s, në një kohë kur kriza në Krime vazhdon.
Rreth 150 ushtarë të Ushtrisë amerikane "173rd Airborne Brigade Combat Team" me bazë në Vicenza të Italisë, do të mbërrijnë në Poloni të mërkurën për nisjen e stërvitjes së përbashkët me trupat polake. Gjithashtu, rreth 450 trupa të tjera nga i njëjti grup ushtarak do të mbërrijnë më vonë në Lituani, Letoni dhe Estoni për stërvitje të ngjashme.
Trupat do të vendosen në këto 4 vendet deri në 28 prill dhe ushtrimet do të zgjasin për afro një muaj, njoftoi Kirby nëpërmjet një konferencë shtypi në Pentagon.(Albana)