2018-09-04 14:39:54 | CRI | Komenti juaj | Printoni |
Gao Min-i ka lindur në vitin 1971 në qytetin Zigong të provincës kineze Sichuan. Që kur ishte e vogël asaj i pëlqente uji dhe nisi të notonte që në moshën 4 vjeçe. E megjithatë, sporti i parë me të cilin do të merrej Gao Min-i, falë edhe trupit të vet të imët, ishte gjimnastika. Por sërish dashuria e vet për notin e bënte që të shkonte shpesh në pishinën e shkollës sportive ku mësonte. Dhe pikërisht aty u pikas nga një trajner i kërcimit në ujë, i cili e bindi të kalonte pikërisht në këtë sport. Dhe kështu në moshën nëntëvjeçare nisi një karrierë e shkëlqyer.
Shumë shpejt vogëlushja e tregoi talentin e vet dhe hyri në ekipin e kërcimit në ujë të provincës Sichuan.
Në moshën 13-vjeçare, Gao Min-i u shpall kampione bote për grupmoshën e saj në kërcimin një dhe tre metra nga trampolina. Në vitin 1985 Gao fitoi titullin kampione kombëtare dhe u pranua në ekipin e kërcimit në ujë të Kinës. Trajneri i saj Xu Yiming kujton: "Ajo ishte e para që vinte në pishinë dhe e fundit që largohej."
Kjo stërvitje e mundimshme i dha rezultatet e saj. Në kampionatin botëror të vitit 1986 në Madrid, Gao Min e siguroi fitoren në hedhjen tre metra nga trampolina që para provës së fundit. Por ajo nuk u kënaq me këtë rezultat dhe vendosi të shënojë rekord. Dhe me 582.90 pikë, Gao Min-i fitoi titullin e parë kampione bote për Kinën dhe vendosi rekord botëror. Por pa kaluar shumë ajo do ta thyente këtë rekord.
Në vitin 1987, Gao Min-i triumfoi në Kupën e Botës në tre metra nga trampolina si në garën ekipore, ashtu edhe atë individuale. Ajo u bë e para dhe e vetmja sportiste e kërcimit në ujë deri tani që arriti të marrë mbi 600 pikë, duke e përsëritur madje edhe dy herë të tjera një gjë të tillë.
Në vitin 1988 do të ishte pjesëmarrja e parë e Gao Min-it në Lojërat Olimpike. Ajo do të dëshmonte se ishte mbretëresha e kërcimit në ujë, duke marrë medaljen e artë me 580.23 pikë dhe duke e bërë Kinën të fillonte të shndërrohej në një superfuqi në këtë sport.
Pas një viti, në Kupën e Botës Gao Min-i do të merrte përsëri medalje të artë, këtë herë jo vetëm në kërcimin nga trampolina 3 metra, por edhe në atë 1 metër.
Viti 1990 do të sillte pesë medalje të arta për Gao Min-in, tre në Lojërat Aziatike, që atë vit u zhvilluan në Pekin, dhe dy në Lojërat e Vullnetit të Mirë në Siatëll.
Një vit më pas në Australi, Gao Min-i fitoi dy tituj kampione bote, përsëri në kërcimin një dhe tre metra nga trampolina. Pas kësaj, ajo donte ta linte sportin, por trajneri e bindi të mos e bënte një gjë të tillë për të paktën një vit.
Në Lojërat Olimpike të Barcelonës në vitin 1992, Gao Min-i shoqërohej kudo nga katër mjekë. Stërvitja e mundimshme, dëmtimet dhe presioni e kishin bërë punën e tyre. E megjithatë, ato nuk e penguan vullnetin e sportistes kineze për të mbrojtur titullin kampione olimpike. Kur u ngjit në podium për të marrë medaljen e artë, Gao Min-i, që kishte fituar zemrat e njerëzve edhe për buzëqeshjen që i shihej përherë në fytyrë, nuk mundi të mos shpërthente në lot. Pas kësaj Gao Min-i e la sportin, si sportistja më e njohur kineze në atë kohë dhe një nga sportistet më të mëdha të kërcimit në ujë përgjatë historisë.
Gao Min-i u zgjodh për një numër rekord prej shtatë herësh sportistja më e mirë femër e kërcimit në ujë, nga viti 1986 deri në 1992, periudhë kur mbretërimi i saj ishte absolut.
Në vitin 1998 Gao u përfshi në Hollin Ndërkombëtar të Famës të Notit. (Artan Goga)