Një raport optimist mbi ekonominë kineze

Kina publikoi të hënën raportin për ekonominë kombëtare në vitin 2018. Ndër të dhënat statistikore, shifrat që tërheqin më shumë vëmendje janë si më poshtë. PBB-ja i kaloi për herë të parë 90 trilionë juanët, me një rritje prej 6.6 % në krahasim me vitin 2017, duke realizuar objektivin e 6.5 për qind. Ndërkohë, treguesi i çmimit të konsumit (CPI) u rrit 2.1 %, më pak se parashikimi prej 3%. U shtuan 13.61 milionë të punësuar, duke e realizuar 123.7 % objektivin. Të ardhurat për frymë arritën në 28 228 juanë në vit, me një rritje reale 6.5%, që është më e lartë se rritja e PBB-së për frymë. Vëllimi i import-eksportit të mallrave i kaloi për herë të parë 30 trilionë juanët, duke u rritur me 9.7% dhe duke shënuar rekord. Të gjithë këta tregues tregojnë se Kina realizoi si duhet parashikimin për ekonominë, të përcaktuar në fillim të vitit të kaluar dhe se ajo mbetet motori i fuqishëm i rritjes së ekonomisë botërore.

2018-a nuk ishte një vit i zakonshëm për Kinën. Nga njëra anë, ajo duhej të thellonte më tej Reformën e Hapjen dhe, nga ana tjetër, u detyrua të përballojë rrymën e deglobalizimit dhe rreziqet e acarimit të fërkimeve tregtare, që të ruajë rritjen ekonomike në një nivel të arsyeshëm. Në këtë situatë shumë të ndërlikuar, nuk ishte e lehtë për Kinën të realizonte me sukses objektivat kryesore të zhvillimit.

Duke analizuar vëllimin e përgjithshëm të ekonomisë, shihet një rritje e qëndrueshme. Në vitin 2000, vëllimi i përgjithshëm i ekonomisë kineze i kaloi për herë të parë 10 trilionë juanët, në vitin 2016 70 trilionë juanët, ndërsa vjet 90 trilionë juanë. Kapërcimet e herëpashershme pasqyrojnë bazën e fortë të ekonomisë kineze.

Nga këndvështrimi i shpejtësisë së rritjes ekonomike, 6.6% shënoi rritjen më të ngadalshme gjatë viteve të fundit, megjithatë ndodhet përsëri në një nivel të arsyeshëm dhe përputhet me kërkesën e periudhës kalimtare të zhvillimit të Kinës, nga rritja e shpejtë në rritjen cilësore. Duhet të vihet të dukje se me këtë përqindje të rritjes, Kina radhitet prapëseprapë në vendet e para ndër ekonomitë kryesore të botës. Vitin e kaluar, Kina kontribuoi për më shumë se 30% të rritjes së ekonomisë botërore dhe qëndroi kontribuuesja më e madhe në këtë rritje.

Është një dukuri shumë normale që të shfaqen luhatje të përkohshme gjatë zhvillimit të ekonomisë. Më e rëndësishmja është mbajtja nën kontroll e prirjes afatgjatë. Në raportin vjetor mbi ekonominë e Kinës, të publikuar në korrikun e vjetshëm nga Fondi Monetar Ndërkombëtar (FMN), vihet në dukje se ekonomia kineze dhe perspektiva e saj janë vazhdimisht të forta. Ky raport i porsapublikuar mbi ekonominë e Kinës vërteton këtë pikëpamje të FMN-së.

Në fakt, raporti për ekonominë kineze gjatë vitit 2018 ka shumë shifra të tjera mbresëlënëse, të cilat dëshmojnë shndërrimin e ekonomisë kineze në zhvillimin më cilësor. P. sh., shpenzimet e konsumit kontribuuan për 76.2% të rritjes së PBB-së, vëllimi i përgjithshëm i shitjes me pakicë të produkteve të konsumit u rrit 9 % dhe koeficienti "Engel" u ul 0.9 pikë përqindjeje. Të gjitha këto tregojnë se konsumi i kinezëve është përshkallëzuar dhe është bërë motori kryesor i nxitjes së rritjes ekonomike. Shpejtimi i investimeve në manifakturë, veçanërisht manifakturën e nivelit të lartë, dhe i investimeve private kanë mbështetur shumë rritjen ekonomike. Kina realizoi rritjen e gjithanshme edhe në import-eksportin me partnerët e vet kryesorë tregtarë, veçanërisht me vendet e nismës "Një brez, një rrugë", me një rritje 13.3%. Kjo tregon se është përmirësuar struktura e tregtisë kineze dhe kjo është në favor të zbutjes së rreziqeve nga fërkimet tregtare. Gjatë vitit të kaluar, energjia e pastër zuri një peshë më të madhe specifike në konsumin e energjisë në Kinë, në saje të zbatimit të programit të zhvillimit të gjelbër në Kinë.

Të gjitha këto të dhëna pozitive tregojnë gjithashtu se, në situatën e ndërlikuar ndërkombëtare, ekonomia kineze tregoi elasticitet dhe aftësi të madhe në përballimin e rreziqeve.

Në vitin 2019, Kina do të hasë patjetër më shumë sfida dhe vështirësi. Për këtë, udhëheqja e lartë e Kinës është e ndërgjegjshme. Në mbledhjen e dhjetorit të vjetshëm të Byrosë Politike të Komitetit Qendror të PKK-së, u paraqit kursi për "ruajtjen e qëndrueshmërisë së mëtejshme në punësim, në sektorin financiar, në tregtinë e jashtme, në investimet e huaja, në investime dhe në parashikimin e ekonomisë".

Edhe Zyra Kombëtare e Statistikave pohon se ekonomia kineze po funksionon mes ndryshimesh dhe shqetësimesh dhe gjendet përballë mjedisit të ndërlikuar të jashtëm dhe nën presionin e uljes.

Në mbledhjen për punët ekonomike të Komitetit Qendror të PKK-së në fund të vitit të kaluar, u bë një gjykim i rëndësishëm, që do të thotë zhvillimi i Kinës ndodhet dhe do të ndodhet në periudhën e mundësive strategjike për një kohë të gjatë.

Raporti për ekonominë kineze 2018 i tregon botës se nuk ndryshon gjendja e përgjithshme e zhvillimit të shëndetshëm e të qëndrueshëm të ekonomisë kineze, nuk ndryshojnë elementet e prodhimit për zhvillimin cilësor, nuk ndryshon as prirja e mirë e zhvillimit afatgjatë të Kinës.

Me inkurajimin e këtij raporti, kinezët do të kenë më shumë besim për kryerjen si duhet të punëve të veta, ndërsa bota do të jetë plot besim për të ardhmen e ekonomisë kineze. (Wang Lei)