Markat europiane nxiten të hyjnë në tregun kinez

2017-06-05 15:55:00 CRI Komenti juaj Printoni

Të tërhequra nga përmasat e tregut kinez dhe shtresa e mesme në zgjerim e sipër, kompanitë europiane po përpiqen t'u shesin klientëve kinezë produktet e tyre nëpërmjet platformave elektronike. Por, promovimi i markave dhe garantimi i cilësisë së produkteve përbëjnë vështirësi para eksploruesve europianë në Lindjen e Largët.

Itzel Arriaga, kryemenaxhere e grupit Moronni International fluturoi nga selia e kompanisë në Hollandë në një mbledhje të organizuar në Frankfurt nga njëra ndër platformat më të mëdha elektronike kineze Netease Kaola .

Kompania e Arriagës, e specializuar për artikuj kozmetikë ka degë në katër kontinente të botës, duke përfshirë edhe Kinën. Gjatë mbledhjes ajo ndoqi me vëmendje çdo folës, pasi nuk donte të humbiste asnjë njoftim lidhur me shanset e biznesit në tregun "gjigant" kinez, siç u shpreh ajo.

Arriaga shpreson që përveç zyrës në qytetin Chongqing të Kinës Jugperëndimore, marka Moronni të mund të promovohet ndaj më shumë konsumatorëve kinezë, nëpërmjet bashkëpunimit me platformat elektronike.

Si ajo, mbi 60 pjesmarrës të kompanive të fuqishme europiane në mbledhje shprehën edhe interes për shitjen e produkteve të tyre në Kinë. Në krahasim me ekonominë europiane, në rigjallërim të ngadaltë, rritja e shtresës së mesme të shoqërisë kineze dhe kërkesat e tyre të konsumit janë mjaft tërheqëse.

Krahasuar me homologët japonezë dhe jugkoreanë, kompanitë europiane kanë vepruar më ngadalë në zënien e tregut kinez.

5 vite më parë, kur lulëzoi tregtia online në Kinë, biznesmenët amerikanë dhe jugkoreanë ishin të parë që krijuan bashkëpunim me platformat elektronike për eksportin e mallrave. Më vonë, erdhën japonezë pasi panë aftësinë e jashtëzakonshme konsumatore të turistëve kinezë.

Ndërsa kompanitë europiane u treguan më të rezervuara.

"Mbase ishin të kujdesshme ndaj rijësive dhe preferonin të mos ndryshonin stilin e punës", tha Zhang Lei, CEO e Netease Kaola.

Pas këtij hezitimi, më në fund ata kuptuan rëndësinë e tregut kinez. Sipas të dhënave të publikuara nga Kaola, shumë kompani europiane ndërmorën nisma për bashkëpunim me platformat elektronike.

Li Jing, një agjent kinez i Ricosta-s, një markë gjermane për këpucë fëmijësh i tha Global Times-it se kjo kompani ka vërejtur se po rritet me shpejtësi numri i klientëve kinezë që shpenzojnë shumë për rritjen e nivelit të jetesës.

Sonja Muller nga Dhoma e Tregtisë e Frankfurt mbi Main vuri në dukje se në të kaluarën, shumica e produkteve europiane që eksportoheshin drejt Kinës ishin industriale, ndërsa tani ato janë për përdorim vetjak.

Në marsin e sivjetshëm, supermarketi gjerman Aldi hapi një dyqan vizual në platformën elektronike kineze Tmall. Ndërsa, Wal-Mart po bashkëpunon me JD.com për të prezantuar markën britanike të supermarketit Asda në tregun kinez.

Ndërkohë, në mbledhjen e fundit për krijimin e partneritetit, Kaola deklaroi se do të blejë mbi 3 miliardë euro produkte nga Europa.

"Konsumtarët tanë janë mbi 100 milionë dhe i përkasin shtresës së mesme kineze. Kjo forcë po drejton shkallëzimin e nivelit të konsumit në Kinë. Gjithashtu, stili i jetesës së tyre është i lidhur ngushtë me internetin", tha znj. Zhang.

Sipas mediave, shtresa e mesme kineze i kushton më shumë vëmendje cilësisë së produkteve sesa çmimeve. "Ata kanë braktisur konceptin e ekonomisë së planifikuar, kur ishte normale mungesa e produkteve. Nga ana tjetër, kërkesat e tyre për cilësinë e lartë të jetesës nuk mund të plotësohen krejtësisht nga prodhimet vendëse, ndaj ata janë gati të shpenzojnë më shumë për produktet e importuara", theksohet në një analizë të botuar në uebsajtin e njohur kinez të informacioneve sohu.com.

Deri tani, produktet gjermane dhe ato franceze shiten më mirë në platformat elektronike kineze. Ndërsa, një zëdhënës i Ministrisë së Tregtisë të Kinës theksoi se Kina nuk synon suficitin me Europën në fushën e tregtisë së mallrave.

Deklarata të tilla i nxitin biznesmenët europianë të futen në tregun kinez. Në krahasim me formën e kaluar shitëse, tregtia në internet ka epërsi të veçantë. Sipas znj. Zhang, rezerva e një produkti mund të mbarojë brenda një jave në platformën e Kaola-s, ndërsa në dyqanet tradicionale do të duhen disa muaj që të shitet.

Pavarësisht kësaj, suksesi mund të përballet me vështirësi. Në mbledhjen e partneritetit me Kaola-n, disa kompani europiane ankoheshin se për të plotësuar kërkesat e konsumatorëve kinezë hasnin vështirësi në balancimin e cilësisë me sasinë e artikujve të tyre.

Përfaqësuesi i një kompanie gjermane u shpreh se aftësia prodhuese e kompanisë së tij nuk mund të përmbushte në kohë kërkesat e tregut kinez. Kurse, Arriaga i tha Global Times-it se rritja e vëllimit të prodhimit përbën një sfidë të madhe për garantimin e cilësisë.

Një problem tjetër është produkte pirate. Tani, platformat elektronike kineze si Tmall, Kaola, JD.com, për të zgjidhur këtë problem kanë krijuar sistem kontrolli për monitorimin e cilësisë së produkteve. Dyqanet që shesin mallra me çmim të ulët, për të cilat blerësit online ankohen shpesh për shitjen e produkteve false do të përballen me gjoba të mëdha, madje dhe me mbyllje të përhershme të veprimtarisë së tyre tregtare në internet.

Mrekulli
Lajmet Kryesore