Raporti i FMN-së tregon besimin ndërkombëtar te ekonomia kineze

Zëdhënësi i Ministrisë së Punëve të Jashtme të Kinës Geng Shuang tha të martën në Pekin se raporti "Parashikimi i ekonomisë globale" i publikuar nga Fondi Monetar Ndërkombëtar, e ka rritur parashikimin për rritjen e ekonomisë kineze, duke treguar vlerësimin nga bashkësia ndërkombëtare të ekonomisë kineze dhe besimin në perspektivën e saj.

Fondi Monetar Ndërkombëtar publikoi ​​raportin "Parashikimi i ekonomisë globale", duke ulur parashikimin e rritjes ekonomike globale për këtë vit dhe vitin e ardhshëm në 3.3 % e 3.4%, dhe duke ngritur parashikimin për rritjen ekonomike të Kinës për këtë vit në 6 %. Lidhur me përmbajtjen e raportit, Geng Shuang-u theksoi se tani situata ndërkombëtare është e ndërlikuar dhe faktorët e paqëndrueshmërisë e pasigurisë janë rritur ndjeshëm. Që nga viti 2019, FMN-ja ka ulur në mënyrë të përsëritur parashikimin e vet për rritjen ekonomike globale. Në fillim të vitit të ri, FMN-ja ka ulur edhe një herë parashikimin për rritjen e ekonomisë globale. Kjo tregon që presioni i rënies mbi ekonominë botërore nuk është lehtësuar. Geng Shuang-u tha:

"Në këtë kontekst, funksionimi i ekonomisë kineze vazhdon të ruajë një moment të mirë stabiliteti e përparimi të përgjithshëm. Sipas të dhënave më të fundit, PBB-ja e Kinës në vitin 2019 u rrit me 6.1% krahasuar me 2018-n, duke u renditur në mesin e ekonomive më të mëdha në botë, dhe PBB-ja për frymë i kaloi dhjetë mijë dollarët. PBB-ja e Kinës pritet të përbëjë më shumë se 16 % të vëllimit të përgjithshëm botëror. Kontributi i rritjes së ekonomisë së Kinës në rritjen ekonomike botërore pritet të arrijë në rreth 30 %. Rritja e parashikimit për ekonominë kineze tregon vlerësimin e performancës së ekonomisë kineze nga bashkësia ndërkombëtare dhe besimin në perspektivën ekonomike të Kinës".

Geng Shuang-u theksoi gjithashtu se, përkundër rreziqeve dhe sfidave në rritje brenda dhe jashtë vendit, bazat e zhvillimit ekonomik afatgjatë të Kinës nuk kanë ndryshuar, dhe dinamika e brendshme, rezistenca e fortë dhe potenciali i madh i ekonomisë kineze nuk kanë ndryshuar. Sivjet Kina do të vazhdojë t'i përmbahet linjës kryesore të reformave strukturore në fushën e ofertës, të promovojë në mënyrë aktive zbatimin e politikave e të masave të ndryshme, dhe të sigurojë që ekonomia të ruajë rritjen me shpejtësi të mesme në të lartë dhe të shkojë drejt nivelit të mesëm në të lartë.(Vera)