2018-09-21 20:25:55 | CRI | Komenti juaj | Printoni |
Sistemi i zgjidhjes së mosmarrëveshjeve i OBT-së është thelbi i sistemit të tregtisë shumëpalëshe globale, agjencia e apelit e OBT-së i ngjan gjykatës supreme që ka të drejtën e gjykimit përfundimtar për mosmarrëveshjet tregtare të anëtarëve. Nëse kjo agjenci do të funksionojë siç duhet, ajo do të vendosë efikasitetin e OBT-së. Më 27 gusht, ShBA-ja hodhi poshtë me vota mandatin e dytë të gjyqtarit Servansing, ç'ka do të thotë se në agjencinë e apelit të OBT-së do të mbeten vetëm 3 gjyqtarë. Ky numër gjyqtarësh është i domosdoshëm për gjykimin e çështjeve tregtare, nëse njëri prej tyre, për shkaqe të ndryshme, nuk do të marrë pjesë në gjykim, atëherë kjo agjenci do të ndalojë funksionimin e saj.
Tani shmangia e paralizimit të sistemit të zgjidhjes së mosmarrëveshjeve të OBT-së është bërë një nga çështjet më urgjente në reformën e kësaj organizate, por për të nxitur reformën e OBT-së dhe zhvillimin e lulëzimin e ekonomisë globale, nevojitet arritja e disa mendimeve të rëndësishme unanime nga ekonomitë kryesore botërore, të cilat janë:
1. Heqja e pengesave të palës amerikane ndaj agjencisë së apelit.
2. Mbyllja në kafaz e proteksionizmit dhe unilateralizmit.
3. Këmbëngulja në parimin e arritjes së konsensusit nëpërmjet konsultimeve.
Ministri i Jashtëm kinez, Wang Yi, u shpreh kohët e fundit se në procesin e reformës së sistemit të tregtisë ndërkombëtare, nuk duhet të mënjanohen parimet themelore të OBT-së, nuk duhet të mënjanohen të drejtat e interesat e ligjshme të vendeve në zhvillim dhe nuk duhet të hiqet dorë nga parimi i arritjes së konsensusit nëpërmjet konsultimeve. Qëllimi i reformës së OBT-së duhet të jetë ndarja e barabartë e rezultateve të zhvillimit të globalizimit nga vendet e ndryshme dhe jo zgjerimi i mëtejshëm i hendekut midis Veriut dhe Jugut. Reforma e OBT-së prek interesat e palëve të ndryshme, duhet të dëgjohen gjerësisht mendimet e palëve të ndryshme, veçanërisht mendimet e vendeve në zhvillim. (Fani)