Tradita kineze në parkun e Liqenit Artificial

Një objekt origjinal që sjell traditën kineze të ndërtimit në Shqipëri do t'i shtohet parkut të madh të Liqenit Artificial, që do të shërbejë si një vend relaksi, por edhe bisedash me miqtë.

Në bashkëpunim me ambasadën kineze në Tiranë, ka nisur ndërtimi i një objekti të veçantë në stilin kinez dhe që do të quhet "Bisedka kineze".

Lajmin e bën të ditur Agjencia e Parqeve dhe Rekreacionit, e cila informon gjithashtu se materialet për këtë objekt janë sjellë enkas nga Kina dhe po montohet në bashkëpunim me specialistët kinezë.

"Drejt përfundimit Bisedka më speciale në Parkun e Madh! Një bashkëpunim me Ambasadën Kineze, ndërtimi nën kujdesin e miqve kinezë dhe APR, materialet enkas nga Kina për Parkun e Madh! Pavioni Rekreativ i dedikohet miqësisë Kinë-Tiranë! Relaks e atmosferë ZEN në zemër të Parkut, në shëtitoren buzë liqenit!", shprehet Agjencia e Parqeve dhe Rekreacionit. (ATSH)