2018-08-11 10:51:46 | CRI | Komenti juaj | Printoni |
Zv.ministri kinez i Bujqësisë dhe Çështjeve Rurale, Han Jun, tha se Kina do të vazhdojë të hapë sektorin bujqësor, pavarësisht tensioneve tregtare me Shtetet e Bashkuara.
Ai tha se Kina gëzon burime të diversifikuara të importeve nga një gamë e gjerë tregjesh jashtë vendit, që sipas tij ndihmon për të siguruar që kundërmasat e qeverisë kineze kundër tarifave të ShBA-së të kenë një ndikim të kufizuar në tregun e brendshëm.
Fjalët e tij pasojnë një përshkallëzim të luftës tregtare të nisur nga ShBA-ja, e cila ka çuar në rritjen e tarifave për një gamë të gjerë mallrash në të dy drejtimet.
Kina vendosi tarifa hakmarrëse për mbi 900 produkte bujqësore të ShBA-së, përfshi sojë, drithëra, pambuk dhe mish.
ShBA-ja eksporton rreth gjysmën e prodhimit të saj vjetor të sojës, afro 100 milionë tonë.
Rreth 30 millionë tonë sojë janë rezervuar në Kinë këtë vit.
Kompanitë kineze kanë ndaluar në shkallë të gjerë blerjen e sojës amerikane pas hyrjen në fuqi të tarifave prej 25 për qind në korrik. Kjo ka krijuar një ngadalësim të përkohshëm në importet e sojës në Kinë këtë verë.
Megjithatë, zv.ministri i Bujqësisë Han Jun tha se kjo është e përkohshme, pasi të korrat e sojës në hemisferën jugore do të nisin në tetor.
Pavarësisht nga fërkimet tregtare, Han Jun thotë se qeveria kineze synon të vazhdojë me planet e saj për të hapur sektorin bujqësor të Kinës, si dhe për të zgjeruar më shumë importet nga tregu global.
Importet bujqësore kineze kryesisht përmbajnë soje, sheqer dhe pambuk. (Albana)