Ndahen "Çmimet Pulitzer" për vitin 2018

Gazeta "The New York Times" dhe revista "The New Yorker" kanë fituar së bashku "Çmimin Pulitzer" për vitin 2018 për shërbimin publik për raportimin dhe ekspozimin e ngacmimeve seksuale nga njerëz të pasur e me pushtet, përfshirë dhe producentin e Hollivudit, Harvey Weinstein.

Fituesit u njoftuan nga administratorja e "Çmimit Pulitzer" Dana Canedy, gjatë një veprimtarie të hënën në Universitetin Kolumbia të Nju Jorkut.

"Në kategorinë e gazetarisë për shërbim publik, 'Çmimi Pulitzer' u jepet së bashku 'The New York Times' për raportimin e udhëhequr nga Jodi Kantor dhe Megan Twohey dhe 'The New Yorker' për raportimin e Ronan Farrow, për gazetarinë e tyre shpërthyese e me ndikim që ekspozoi njerëz të pasur e me pushtet, duke përfshirë akuzat ndaj një prej producentëve më me ndikim të Hollivudit, e duke shkaktuar një reagim ndërkombëtar në lidhje me abuzimin seksual ndaj grave," theksohet në motivacionin e çmimit.

Gazeta 'The New York Times' u vlerësua gjithashtu së bashku me 'The Washington Post' për mbulimin e hetimit për përfshirjen e Rusisë në zgjedhjet presidenciale të ShBA-së në vitin 2016. (Leftion Peristeri)