Kryeministrat e Kinës dhe Singaporit takohen për të nxitur bashkëpunimin dypalësh

Kryeministri kinez Li Keqiang u takua të martën në Pekin me homologun e Singaporit Lee Hsien Loong. Kjo vizitë synon të përmirësojë lidhjet dhe bashkëpunimin mes dy vendeve.

Kjo është vizita e parë zyrtare e kryeministrit Lee Hsien Loong në Kinë që kur mori detyrën në vitin 2014. Ajo u realizua papritmas, pasi u njoftua të premten përpara vizitës së tij të planifikuar në ShBA në muajin e ardhshëm.

Në vitet e fundit lidhjet dypalëshe kanë kaluar disa vështirësi, veçanërisht pasi Singapori mbështeti haptazi vendimin e një gjykate ndërkombëtare mbi mosmarrëveshjet territoriale në Detin e Kinës Jugore.

Gjatë takimit të së martës, kryeministri kinez Li Keqiang u bëri thirrje të dy vendeve që t'i drejtojnë marrëdhëniet dypalëshe në binarët e duhur të zhvillimit.

"Kina dhe Singapori janë miq të mirë. Që nga vendosja e marrëdhënieve diplomatike, të dyja palët nuk e kanë reshtur thellimin e bashkëpunimit pragmatik mbi parimin e barazisë dhe respektit të ndërsjellë, duke u sjellë përfitime të dy popujve. Singapori është një anëtar i rëndësishëm i ASEAN-it, koordinatori i tanishëm midis Kinës dhe ASEAN-it dhe kryesuesi i radhës i bllokut. Ne shpresojmë dhe besojmë se vizita juaj do të injektojë vrull të freskët jo vetëm në marrëdhëniet sino - singaporeze por edhe në lidhjet mes Kinës dhe ASEAN-it në tërësi."

Kina shpreson se Singapori do të mbështesë kompanitë kineze që duan të marrin pjesë në projektin e ndërtimit të hekurudhës së shpejtë midis Singaporit dhe Malajzisë. Kësaj kërkese të kryeministrit kinez, udhëheqësi i Singaporit iu përgjigj pozitivisht, duke vlerësuar përparësitë, sigurinë dhe kostot efikase të teknologjisë së hekurudhave të shpejtësisë së lartë.

Gjithashtu, udhëheqësi i Singaporit, Lee Hsien Loong, u shpreh i gatshëm për të punuar për afrimin e Kinës me vendet e ASEAN-it.

"Ndihem shumë i lumtur që kthehem në Pekin dhe u jam shumë mirënjohës për vëmendjen tuaj ndaj marrëdhënieve tona dypalëshe dhe gjithashtu për mundësinë për të diskutuar dhe punuar së bashku në kontekstin rajonal me ASEAN-in. Vitin e ardhshëm Singapori do të jetë kryesuesi i radhës i ASEAN-it. Ne shpresojmë që në këtë detyrë do të kontribuojmë për në afrimin e ASEAN-it dhe të Kinës".

Zoti Lee do të pritet gjithashtu në takime edhe nga udhëheqës të tjerë të lartë të Kinës, duke përfshirë dhe presidentin Xi Jinping. (Leftion Peristeri)