2017-07-21 19:25:12 | CRI | Komenti juaj | Printoni |
Nisma është prezantuar gjatë takimit të ministrit të Punëve të Jashtme Ditmir Bushati me ministrin e Punëve të Brendshme të Francës, Gérard Collomb.
Tema kryesore e takimit midis dy ministrave ishte gjendja e krijuar nga rritja e kërkesave për azil në Francë, përfshirë edhe nga fëmijë të mitur të pashoqëruar.
Një prej masave të propozuara nga qeveria shqiptare është dislokimi i oficerëve të policisë franceze në Shqipëri për të kryer operacione të përbashkëta me policinë kufitare shqiptare.
"Jemi të ndërgjegjshëm për liritë dhe detyrat që ofron lëvizja e lirë në hapësirën Schengen dhe shumë të vendosur për të mos toleruar kërkesat abuzive për azil," tha ministri Bushati në përfundim të takimit.
Ministri Collomb theksoi se Franca është e gatshme të ofrojë mbështetjen e saj në këtë drejtim.
"Shqipëria është një vend i sigurt dhe dua të përshëndes planin ambicioz të veprimit si dhe vullnetin e qeverisë shqiptare," theksoi Collomb.
Ministri Bushati informoi gjithashtu ministrin Collomb mbi ecurinë e reformave kyçe për çeljen e negociatave për anëtarësim në Bashkimin Europian, duke u ndalur tek zbatimi i procesit të rivlerësimit të gjyqtarëve dhe prokurorëve dhe ndikimi që reforma në drejtësi do të ketë në fushën e sigurisë.
Gjithashtu, në kuadër të Partneritetit Strategjik të nënshkruar këtë vit midis dy vendeve, Shqipëria dhe Franca do të forcojnë bashkëpunimin në luftën kundër terrorizmit. (Leftion Peristeri)