Presidenti Nishani takon zv./kryeministrin kinez Zhang Gaoli

2017-04-17 19:31:14 CRI Komenti juaj Printoni

Presidenti Bujar Nishani priti sot (të hënën) në një takim të veçantë zëvendëskryeministrin kinez, Zhang Gaoli, i cili po zhvillon një vizitë dy ditore në Shqipëri.

Presidenti Nishani përshëndeti vizitën e z. Zhang në Tiranë, duke e konsideruar si një shenjë domethënëse miqësie e të vëmendjes që Kina dhe zyrtarët e saj më të lartë po i kushtojnë në vitet e fundit marrëdhënieve me Shqipërinë, si dhe një nxitje e mëtejshme e bashkëpunimit në të gjitha fushat, si ato institucionale e politike, ashtu edhe ato ekonomike e kulturore.

Siç njofton Zyra e Presidentit, kreu i shtetit vlerësoi gjithashtu klimën e mirë të bashkëpunimit dhe, duke u fokusuar në marrëdhëniet dypalëshe u shpreh se, në themel të tyre qëndrojnë marrëdhëniet miqësore mes dy popujve e dy vendeve. Presidenti vlerësoi gjithashtu se, në dekadën e fundit këto marrëdhënie kanë hyrë në një fazë të re dhe bashkëpunimi ekonomik po zgjerohet në kushtet e reja të zhvillimeve rajonale e globale.

Kreu i shtetit e njohu shkurtimisht zyrtarin e lartë kinez me zhvillimet në rajonin e Ballkanit, duke evidentuar progresin në drejtim të paqes dhe stabilitetit pas konflikteve të armatosura e të dhunshme që shoqëruan shpërbërjen e ish-Jugosllavisë, si dhe zhvillimet pozitive në këtë drejtim, veçanërisht pas pavarësisë së Kosovës.

Duke vlerësuar e përshëndetur rolin e Republikës Popullore të Kinës në arenën ndërkombëtare dhe të Kombeve të Bashkuara, në mbështetje të paqes dhe sigurisë, si në nivel global ashtu edhe në nivel rajonal, Presidenti Nishani shprehu besimin se ky rol do të shtrijë efektet e veta pozitive edhe në rajonin e Ballkanit Perëndimor.

Në fund të takimit, presidenti Nishani përcolli, përmes zotit Zhang Gaoli, përshëndetjet më të përzemërta për Presidentin e Republikës Popullore të Kinës, Xi Jinping si dhe një ftesë për ta vizituar Shqipërinë në një kohë sa më të përshtatshme. (Leftion Peristeri)

Mrekulli