Kamberra, kryeministri Li paralajmëron kundër proteksionizmit dhe një lufte të re të ftohtë

Gazeta 'The Australian', në të cilën kryeministri kinez Li Keqing publikoi një editorial në prag të vizitës në Kamberra, raportoi me humor se udhëheqësi kinez e viziton vendin "me njërin sy nga tregu i mishit të viçit".

Këtë raport, kryeministri Li e përmendi në hyrje të fjalimit të tij para parlamenti australian të enjten.

"Kur i hodha një sy menysë, 'pyeta nëse për sot kishte mish viçi?' dhe më thanë 'Jo, për ju kemi mish pule."

Batuta e udhëheqësit kinez u shoqërua me të qeshura dhe duartrokitje në sallën e parlamentit.

Prodhuesit australianë të mishit të viçit po përpiqen të përfitojnë nga vendimi i fundit i Kinës për të pezulluar importin e mishit nga Brazili, pas skandalit që shpërtheu me sigurinë ushqimore.

Por duke marrë një ton më serioz, kryeministri Li tha se mishi i viçit dhe i pulës nuk ishin të vetmit në axhendën e tij.

Kina dhe Australia kanë nënshkruar në vitin 2015 një marrëveshje të gjerë të tregtisë së lirë, një lëvizje e cila çimentoi pozicionin e Kinën si partnerin më të madh tregtar të Australisë.

Zyrtarë nga të dy vendet kanë lajmëruar shtimin e nivelit të liberalizimit, masat për të cilin do të njoftohen nga vetë kryeministri Li. Sipas statistikave të Kinës, vendi regjistroi një deficit tregtar prej 50 miliardë dollarësh me Australinë vitin e kaluar.

Kryeministri Li tha se zgjerimi i marrëveshjes së tregtisë së lirë është zgjidhja e duhur e pabarazisë.

"Zërat kundër proteksionizmit po rriten, së bashku me ata kundër globalizimit ekonomik. Nuk mund të mohojnë se në procesin e globalizimit, në fakt, disa pjesë të botës, për disa popuj, për disa vende, ka pasur probleme. Por kjo nuk është çështja e globalizimit në vetvete, nuk është një çështje e tregtisë së lirë, por kjo e gjitha është se si t'i përgjigjemi gjendjes së krijuar."

Në vitin 2016 Australia i shiti Kinës mallra bujqësore me vlerë rreth 60 miliardë dollarë amerikanë. (Leftion Peristeri)