Tirana-Partizani 1- 4. Rezultati i fiksuar dy ditë më parë në tabelën elektronike të stadiumit kombëtar "Qemal Stafa" nuk ka sjellë kurrë kaq shumë biseda dhe eufori. Tifozët e Partizanit, skuadra, presidenti apo trajneri, kanë qenë në eufori të plotë. Madje, rezultatin 4-1 nuk e ka pritur askush për hir të së vërtetës. Trajneri Lika dje ka dalë sërish në stërvitje, duke nisur përgatitjet për ndeshjen e Kupës me Dinamon në mesjavë, ndërkohë që tek futbollistët ka mbizotëruar entuziazmi. Pikërisht kjo ka qenë ajo që ka qenë edhe frika e trajnerit të kuq. "Duhet të kemi kujdes nga euforia, pasi Tirana iku dhe ne kemi shumë punë", tha ai. Në stërvitje janë zbuluar edhe detaje të tjera interesante, si ajo që Gjergji Muzaka ka qenë në fushë me 39, duke sakrifikuar jo pak. Pas një mbrëmje të tillë, të gjithë ndjehen krenarë në kampin e kuq. Presidenti Xhani është parë më i gëzuar se kurrë në fund të ndeshjes, kur vrapoi për tek tifozët duke gëzuar edhe ai vetë si një lojtar. Më pas, fjalët më të mira për ekipin, duke mos harruar edhe arbitrat e ndeshjes. Jo sepse fitoi Partizani, por treshja e derbit ishte vërtetë në lartësinë e situatës. Një fitore e tillë në derbi në fakt, kishte vite që nuk shihej dhe është kjo një nga arsyet e gëzimit.

Tifozët

Ata kanë qenë gjithnjë krenaria e Partizanit. Gjatë gjithë ditës të shtunën, ishin ndarë në grupe për të përgatitur secili nga një gjë të veçantë. Dhe ashtu ndodhi. Në tribunën karshi, aty ku rreth 4-5 mijë tifozë ulërisnin si të "marrë" për triumfin e ekipit të tyre, dallohej demi që kishte marrë pushtetin mbi zebrën, shallat si në "Anfield Road" e padyshim...thirrjet "Partizan...". Por, skuadra në dalje ka kaluar para një pankarte gjigande ku shkruhej "Ju nuk do të jeni kurrë vetëm!". Natyrisht që lidhet me Liverpulin. "Jemi 4 vetë që e përgatitëm, u morëm gjithë ditën me të", rrëfen Mariglen Kadiu, një nga autorët e kësaj parrulle. "Tani ajo do të jetë përherë në stadium. Unë, bashkë me shokët e mi, Adrianin, Renaton e Minin, jemi edhe tifozë të Liverpulit. Është kjo arsyeja përse zgjodhëm një slogan të tillë", thotë më tej ai. Ndaj Tiranës, Ata, tifozët e Partizanit, kishin kohë që e prisnin një triumf të tillë. "Sot është dita jonë, kushedi sa kemi thirrur mbrëmë. Kishim kaq kohë që e prisnim dhe më në fund jemi ngopur me një fitore të tillë", thonë ultrasët e skuadrës së kuqe. Tirana-Partizani megjithatë, do të mbahet mend për shumë gjëra. Ndeshja, prodhoi futbollin e vërtetë në Shqipëri.

Marrë nga Balkanweb