Sipas njoftimeve të Radios së Jashtme të Kinës, më 19 shkurt Serbia vazhdoi t'i bëjë thirrje komunitetit ndërkombëtar të kundërshtojë shpalljen e njëanshme të pavarësisë së Kosovës dhe u bëri thirrje shtetasve të vendit të mos bëjnë protesta të dhunshme. Në të njëjtën kohë, komuniteti ndërkombëtar vazhdon të bëjë reagime të ndryshme ndaj shpalljes së njëanshme të pavarësisë së Kosovës.

Më 19 shkurt, presidenti i Serbisë Boris Tadiç tha se vetëm veprimet paqësore dhe të arsyeshme do ta ndihmojnë Serbinë të mbrojë në mënyrë të ligjshme Kosovën. Çdo veprim i nxituar do të rrezikojë sigurinë e komunitetit serb të Kosovës. Ai u bëri thirrje shtetasve të mos ndërmarrin asnjë veprim kërcënues dhune.

Po atë ditë, përfaqësuesi i lartë i Bashkimit Evropian për punët e jashtme dhe politikën e sigurimit Havier Solana bëri një vizitë në Kosovë. Gjatë vizitës, ai tha se nëpërmjet dërgimit të misionit të vet në Kosovë, Bashkimi Evropian vërteton praninë e tij në Kosovë.

Më 19 shkurt, Ministria e Jashtme e Rusisë publikoi një komunikatë, ku thuhet se më 18 shkurt, me propozimin e palës amerikane, ministri i Jashtëm i Rusisë Sergei Lavrov bëri një bisedë telefonike me sekretaren e Shtetit të SHBA-së Kondoleza Rajs. Pala ruse ka ritheksuar qëndrimin e saj se nuk pranon pavarësinë e shpallur në mënyrë të njëanshme nga Kosova.

Po atë ditë, zëdhënësi i Departamentit amerikan të Shtetit Sean Mekormak u shpreh se pas shpalljes së njëanshme të pavarësisë së Kosovës, megjithëse Serbia ka tërhequr ambasadorin e saj në SHBA, ambasada e SHBA-së në Serbi vazhdon të funksionojë. Ambasadori amerikan në Serbi vazhdon të qëndrojë në Beograd. (Du) (Artan)